ەكولوگيالىق مونيتورينگتىڭ ناتيجەسى بويىنشا ەلىمىزدىڭ 10 قالاسىندا اتموسفەرالىق اۋانىڭ جوعارى لاستانۋى تىركەلىپ وتىر دەپ حابارلايدى "ادىرنا" ۇلتتىق پورتالى ەكولوگيا مينيسترلىگىنىڭ ءباسپاسوز قىزمەتىنە سىلتەمە جاساپ.
ولاردىڭ قاتارىندا تەمىرتاۋ، نۇر-سۇلتان، الماتى، اقتوبە، اتىراۋ، وسكەمەن، قاراعاندى، بالقاش، جەزقازعان، شىمكەنت قالالارى بار.
بۇل تۋرالى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ مەملەكەت باسشىسىنىڭ 2021 جىلعى 1 قىركۇيەكتەگى قازاقستان حالقىنا جولداۋىن ىسكە اسىرۋ جونىندە وتكەن ۇكىمەت وتىرىسىندا مالىمدەدى.
مينيستر بيىل ەكولوگيالىق كودەكسكە سايكەس كاسىپورىندار ەڭ ۇزدىك قولجەتىمدى تەحنولوگيالاردى (ەۇقت) ەنگىزەتىنىن، مينيسترلىك پەن كاسىپورىنداردىڭ اراسىندا مەموراندۋمدار مەن جول كارتالارىنا قول قويىلعانىن ايتتى. سونداي-اق ول كاسىپورىندار شىعارىندىلاردى 20% پايىزدان 30% پايىزعا دەيىن قىسقارتۋدى جوسپارلاپ وتىرعانىن جەتكىزدى.
سونىمەن 2025 جىلعا قاراي ەلىمىزدىڭ 10 قالاسىنداعى ءبىرىنشى ساناتتاعى كاسىپورىندار ءۇشىن شىعارىندىلار ءليميتى 20 پايىزعا تومەندەتىلەتىن بولادى.
سونداي-اق، ماعزۇم مىرزاعاليەۆ شىعارىندىلاردى ازايتۋ ماقساتىندا اكىمدىكتەر ەلدى مەكەندەر مەن شارۋاشىلىق سۋبەكتىلەرىن گازداندىرۋدى جالعاستىرۋ قاجەت ەكەنىن اتاپ ءوتتى.
"ادىرنا" ۇلتتىق پورتالى.
