بۇۇ-نىڭ بوسقىندار ءىسى جونىندەگى ىزگى نيەت ەلشىسى اندجەلينا دجولي اۋعانستانداعى احۋالعا ەلدىڭ نازارىن اۋدارتۋ ءۇشىن ينستاگرامدا جاڭا پاراقشا اشتى دەپ حابارلايدى "ادىرنا" ۇلتتىق پورتالى CNN-گە سىلتەمە جاساپ.
اندجەلينا دجولي جۇما كۇنى اشقان پاراقشاسىندا اتى-ءجونى مەن مەكەنجايى بۇركەمەلەنگەن اۋعان قىزىنىڭ حاتىن جاريا ەتكەن. الگى قىزدىڭ حاتىندا تالىبتەردىڭ بيلىگى كەزىندە ءوزىنىڭ ومىرىنە الاڭدايتىنىن جانە قورقاتىندىعىن جازادى.
«تالىبتەر باسىپ العانعا دەيىن قۇقىعىمىز بولدى. قۇقىمىزى ەركىن قورعاي دا الاتىن ەدىك. ولار كەلگەننەن كەيىن بارلىعىمىز دا قورقىپ وتىرمىز ءارى بۇكىل ارمانىمىزدىڭ كۇلى كوككە ۇشادى دەپ ويلايمىز»، - دەيدى اۋعان قىزى حاتىندا.
بىرىككەن ۇلتتار ۇيىمىنىڭ بوسقىندار ءىسى جونىندەگى يزگى نيەت ەلشىسى اندجەلينا دجولي حات استىنا قالدىرعان پىكىرىندە ءوزىنىڭ نەگىزگى قۇقىعىمەن كۇرەسىپ جۇرگەن بۇكىل الەمدەگى ادامداردىڭ تاريحى تۋرالى جازۋدى جوسپارلاپ وتىرعاندىعىن اتاپ وتەدى.
"11 قىركۇيەكتەگى لاڭكەستىك ارەكەتتەن ەكى اپتا بۇرىن اۋعانستان شەكاراسىنا بارىپ، تالىبتەردىڭ رەجيمى سالدارىنان ەلدەن قاشقان بوسقىندارمەن كەزدەسكەنمىن. بۇل وسىدان 20 جىل بۇرىن بولعان ەدى. اۋعاندىقتاردىڭ تاعى دا ەلىن جايلاعان بەلگىسىزدىكتەن قورقىپ، بوسقىنعا اينالۋىن كورگەننەن جانىڭ اۋىرادى", - دەپ جازدى ا.دجولي.
تاليبان ەلدى باسقارۋ ءىسىن وزگەرتەتىندىگىن جاريا ەتكەنىنە قاراماستان، تۇرعىنداردىڭ باسىم كوپشىلىگى وعان سەنىمسىزدىكپەن قاراپ وتىر. قۇندىز قالاسى تۇرعىندارىنىڭ ءبىرى تالىبتەردىڭ وزگەرەتىندىگىنە شەك كەلتىرەدى.
«ولار ورتاق قۇندىلىقتاردى اۋعان حالقىمەن بولىسپەيدى. دەموكراتيا – بۇل ولار ءۇشىن ەمەس»، - دەدى ول.
"ادىرنا" ۇلتتىق پورتالى.
