وبلىس اكىمى وڭداسىن ورازالين سپورتپەن جانە دەنە شىنىقتىرۋمەن اينالىساتىن تۇرعىنداردىڭ سانىن، ونىڭ ىشىندە جاستاردى كوبەيتۋدى تاپسىردى دەپ حابارلايدى "ادىرنا" ۇلتتىق پورتالى.
— قولدا بار سپورتتىق سەكتسيالاردى، كلۋبتاردى بارىنشا ءتيىمدى پايدالانىپ، جاڭالارىن اشۋ قاجەت. بۇقارالىق جانە بالالار سپورتى جۇرتشىلىقتىڭ قولى جەتەتىندەي بولۋى كەرەك. سوعان نازار اۋدارۋ قاجەت، — دەدى وبلىس باسشىسى.
№4 وبلىستىق بالالار مەن جاسوسپىرىمدەردىڭ كۇرەس بويىنشا سپورت مەكتەبىنىڭ ماتەريالدىق-تەحنيكالىق قامتىلۋىمەن تانىسىپ شىققان وبلىس اكىمى بالالاردى وسى سپورت تۇرىمەن قامتۋ ءۇشىن مەكتەپ اۋماعىندا تاعى ءبىر عيمارات سالۋ تۋرالى ءوتىنىشتى قولدادى. ويتكەنى اقتوبەلىكتەر اراسىندا كۇرەس سەكتسيالارىنا بۇرىننان جوعارى سۇرانىس بار. جىل سوڭىنا دەيىن جوبالىق-سمەتالىق قۇجاتتامانى بەكىتۋ تاپسىرىلدى.
№1 بالالار مەن جاسوسپىرىمدەر سپورت مەكتەبىندە وبلىس باسشىسى قۇزىرلى ورگاندارعا قابىرعالارداعى جارىقشاقتىڭ سەبەبىن كىدىرتپەي انىقتاپ، ەگەر عيماراتتىڭ قاۋىپسىزدىگىنە زيان كەلتىرمەسە، جويۋدى تاپسىردى. نىسان 2016 جىلى پايدالانۋعا بەرىلگەن.
وبلىس باسشىسى اباتتاندىرۋ جۇمىستارى اياقتالىپ قالعان ترياتلون پاركىن دە قاراپ شىقتى. قازىرگى تاڭدا مۇنداعى جۇگىرەتىن جانە ۆەلوسيپەد جۇرەتىن جولدار تولىعىمەن دايىن، جارىق ورناتىلدى، سۋارۋ جۇيەسى جولعا قويىلدى. حالىقتىڭ قالاۋى بويىنشا جاياۋلارعا ارنالعان جول دا جاسالادى. اركا ىسپەتتى ۇلكەن LED-ەكران ورناتىلادى. وبلىس اكىمى ترياتلون پاركىنىڭ اقتوبەلىكتەر ءۇشىن بارىنشا قولايلى قوعامدىق كەڭىستىك بولۋىن اتاپ ءوتتى.
— جاسىنا نەمەسە جىل مەزگىلىنە قاراماستان مۇندا بارىنە، ياعني سپورتپەن كاسىبي شۇعىلداناتىندارعا دا، جاي جاياۋ ءجۇرىپ قايتقىسى كەلەتىندەرگە دە ىڭعايلى بولۋى كەرەك. بارلىق سپورتتىق نىسانداردا قولايلى جاعداي جاساپ، حالىققا بارىنشا قولجەتىمدى ەتۋ قاجەت. پرەزيدەنت تاپسىرماسىنا سايكەس بۇقارالىق سپورتتى دامىتۋ — باسىم مىندەتتەردىڭ ءبىرى، — دەدى وبلىس اكىمى و.ورازالين.
بۇگىندە اقتوبە وبلىسىندا بالالار مەن جاسوسپىرىمدەرگە ارنالعان بارلىعى 32 سپورت مەكتەبى جۇمىس ىستەيدى، ولاردا 19 مىڭنان اسا بالا جاتتىعادى، تاعى 36 مىڭ بالا اۋلا كلۋبتارىنا بارىپ ءجۇر. بيىل بالالار مەن جاسوسپىرىمدەردىڭ سپورت مەكتەپتەرىنىڭ جاتتىقتىرۋشى-وقىتۋشىلارىنىڭ شتاتى كوبەيىپ، 105 ادامعا ارتتى.
بارلىق اۋداندىق بالالار مەن جاسوسپىرىمدەر سپورت مەكتەپتەرىنىڭ اۋىلدىق وكرۋگتەردە فيليالدارى بار. بۇگىندە 62 اۋىلدا وسىنداي فيليالدار جۇمىس جاساپ تۇر. بالالار مەن جاسوسپىرىمدەر سپورت مەكتەپتەرىنىڭ ماتەريالدىق-تەحنيكالىق بازاسىن نىعايتۋ ءۇشىن 2019 جىلى 40 ميلليون تەڭگە، ال بىلتىر 115 ميلليون تەڭگە بولىنگەن.
سپورتپەن شۇعىلدانعىسى كەلەتىن اقتوبەلىكتەر بارلىعى 1800-دەن اسا سپورت نىسانىنا بارا الادى. سونىمەن بىرگە جاڭا سپورت نىساندارىنىڭ، سونىڭ ىشىندە دەنەشىنىقتىرۋ-ساۋىقتىرۋ كەشەندەرىنىڭ قۇرىلىسى جالعاسۋدا.
جىل باسىنان بەرى اقتوبە قالاسىندا شاڭعى روللەرى تراسساسى مەن ويىل اۋىلىندا دەنەشىنىقتىرۋ-ساۋىقتىرۋ كەشەنى پايدالانۋعا بەرىلدى. قارعالى، تەمىر، مۇعالجار، حرومتاۋ اۋداندارىنىڭ اۋدان ورتالىقتارىندا، سونىمەن قاتار حرومتاۋ اۋدانىنىڭ كوكتاۋ اۋىلىندا بەس دەنەشىنىقتىرۋ-ساۋىقتىرۋ كەشەنىنىڭ قۇرىلىسى جالعاسۋدا.
«سامۇرىق – قازىنا Trust-ءتىڭ» قولداۋىمەن مۇعالجار اۋدانىنىڭ ەمبى قالاسىندا بالالار مەن جاسوسپىرىمدەردىڭ سپورت مەكتەبىنىڭ جانىنان دەنەشىنىقتىرۋ-ساۋىقتىرۋ كەشەنىن تۇرعىزۋ باستالدى. كەلەر جىلى وبلىستاعى بارلىق اۋداندار دەنەشىنىقتىرۋ-ساۋىقتىرۋ كەشەنىمەن قامتىلادى دەپ كۇتىلىپ وتىر.
سونداي-اق بيزنەستىڭ الەۋمەتتىك جاۋاپكەرشىلىگى اياسىندا اقتوبەدە ترياتلون پاركىنىڭ قۇرىلىسى اياقتالىپ، «جۇمىسپەن قامتۋدىڭ جول كارتاسى» اياسىندا بيىل قوزعالىس مۇمكىندىگى شەكتەۋلى جاندارعا ارنالعان سپورت كەشەنىن جانە جارقامىس، جارلى، جاعابۇلاق پەن قۇرىلىس اۋىلدارىندا ءتورت سپورت كەشەنىن سالۋ ءۇشىن قارجى ءبولۋ جوسپارلانۋدا.
قازىرگى تاڭدا اقتوبە وبلىسى حالقىنىڭ 32 پايىزدان استامى دەنە شىنىقتىرۋ جاتتىعۋلارىمەن جانە سپورتپەن قامتىلعان.
"ادىرنا" ۇلتتىق پورتالى.
