اۋعانستاننان قازاقستان ازاماتتارى ەۆاكۋاتسيالاندى، دەپ حابارلايدى "ادىرنا" ۇلتتىق پورتالى Sputnik قازاقستانعا سىلتەمە جاساپ.
قورعانىس مينيسترلىگىنىڭ ءباسپاسوز قىزمەتىنىڭ حابارلاۋىنشا، 42 ادام مىنگەن ۇشاق الماتىعا قوندى.
"18 تامىز ساعات 17.00-دە قازاقستاننىڭ اسكەري اۋە كۇشتەرى س-295 اسكەري-كولىك ۇشاعى اۋعانستاننان ەۆاكۋاتسيالانعان 42 جولاۋشىمەن الماتىعا قوندى. 25 قازاقستان ازاماتى، ونىڭ ىشىندە 15 ەرەسەك ادام جانە 10 بالا، سونداي-اق قازاقستان ەلشىلىگىنىڭ قىزمەتكەرلەرى كەلدى ", - دەلىنگەن اقپاراتتا.
سونىمەن قاتار اسكەري ۇشاقپەن قىرعىز تاراپىنىڭ ءوتىنىشى بويىنشا قىرعىز رەسپۋبليكاسىنىڭ 14 ازاماتى ەۆاكۋاتسيالاندى.
گۋمانيتارلىق وپەراتسيا رەتىندە وسى ۇشاقپەن قازاقستان ەلشىلىگىنە كومەك سۇراپ جۇگىنگەن 1 رەسەي ازاماتى مەن 1 ليتۆا ازاماتى اۋعانستاننان شىعارىلدى.
بۇل اقپاراتتى سىرتقى ىستەر مينيسترلىگىنىڭ رەسمي وكىلى ايبەك سمادياروۆ راستادى.
"بىرنەشە كۇن بۇرىن اۋعانستان اۋماعىندا قازاقستان ازاماتتارى جوق دەپ مالىمدەمە جاساعان ەدىك. سەبەبى ول كەزدە ءبىز بىلەتىن ادامداردىڭ ءبارى شىعىپ كەتكەن. الايدا ەكى-ءۇش كۇننىڭ ىشىندە ەلشىلىككە ءبىر توپ ازامات كەلىپ، ەلگە ورالۋعا ءوتىنىش ءبىلدىردى. قازاقستاندىق قۇجاتتارىن كورسەتتى. بۇگىن عانا وسى جارتى ساعاتتاي بۇرىن الماتى اۋەجايىنا قورعانىس مينيسترلىگىنىڭ ارنايى ۇشاعى قوندى. ونىمەن قازاقستاننىڭ 25 ازاماتى ەلگە جەتكىزىلدى", - دەدى سمادياروۆ ارنايى بريفينگتە.
