اقتاۋدا بيىل بەس شاعىن اۋدان اباتتاندىرىلادى دەپ حابارلايدى "ادىرنا" ۇلتتىق پورتالى.
ماڭعىستاۋ وبلىسى اكىمىنىڭ ءباسپاسوز قىزمەتىنىڭ مالىمەتىنە سۇيەنسەك، قازىرگى تاڭدا قالاداعى №5, №8, №9, №13, №28 شاعىن اۋداندارىندا جۇمىستار قىزۋ جۇرۋدە. وبلىس اكىمى سەرىكتاي ترۇموۆ جاڭارتىلىپ جاتقان شاعىن اۋدانداردى ارالاپ، جۇمىس بارىسىمەن تانىستى.
اتاپ ايتساق، اقتاۋ قالاسىنداعى №5 شاعىن اۋدان بويىنشا 50 024 شارشى مەتر اۆتوكولىك جولى، 15 824 شارشى مەتر جاياۋ جۇرگىنشىلەر جولى، بالالارعا ارنالعان 8 ويىن جانە 2 سپورت الاڭى، №8 شاعىن اۋداندا 42 452 شارشى مەتر اۆتوكولىك جولى، 17 944 شارشى مەتر جاياۋ جۇرگىنشىلەر جولى، بالالارعا ارنالعان 11 ويىن جانە 3 سپورت الاڭى جاساقتالادى.
ال №9 شاعىن اۋداندا بيىل 47 321 شارشى مەتر اۆتوكولىك جولى، 12 813 شارشى مەتر جاياۋ جۇرگىنشىلەر جولى، بالالارعا ارنالعان 10 ويىن جانە 3 سپورت الاڭى، №13 شاعىن اۋداندا 72 151 شارشى مەتر اۆتوكولىك جولى، 19 924 شارشى مەتر جاياۋ جۇرگىنشىلەر جولى، 20 ويىن جانە 9 سپورت الاڭى، سونداي-اق №28 شاعىن اۋداندا 50 913 شارشى مەتر اۆتوكولىك جولى، 26 352 شارشى مەتر جاياۋ جۇرگىنشىلەر جولى، 14 ويىن جانە 7 سپورت الاڭى جاڭارتىلادى. اتالعان جۇمىستارعا بارلىعى 650 ادام، 120 تەحنيكا تارتىلعان.
ايتا كەتسەك، بىلتىردان بەرى اقتاۋ قالاسىندا جىلدار بويى جوندەۋ كورمەگەن شاعىن اۋدانداردى اباتتاندىرۋ بويىنشا كەشەندى جۇمىستار جۇرگىزىلىپ جاتىر.
2020 جىلى "جۇمىسپەن قامتۋدىڭ جول كارتاسى" باعدارلاماسى اياسىندا رەسپۋبليكالىق بيۋدجەتتەن قاراجات ءبولىنىپ، جىل سوڭىنا دەيىن بارلىعى 6, ياعني 2,6,7,12,26 جانە 27 شاعىناۋداندارعا تولىعىمەن كەشەندى اباتتاندىرۋ جۇمىستارى جۇرگىزىلدى. جۇمىستارى اياسىندا 67,2 شاقىرىم اۆتوجول سالىنىپ، 45,8 شاقىرىم جاياۋ جۇرگىنشىلەر جولدارى توسەلدى. 63 دانا بالالار ويىن الاڭدارى مەن 22 سپورت الاڭى تولىقتاي جاڭارتىلدى.
بىلتىرعى جوندەۋ جۇمىستارى قازىنا قاراجاتىنان جاسالسا، بيىلعى اباتتاندىرۋ جۇمىستارى NCOC مەكەمەسىنىڭ دەمەۋشىلىگى ەسەبىنەن جۇرگىزىلۋدە. كەلەر جىلى دا تاعى 5 شاعىناۋدان جوندەلەدى دەپ جوسپارلانىپ وتىر.
جۇمىس بارىسىن ارالاپ كورگەن وبلىس اكىمى جاۋاپتى ماماندارعا ساپاعا ءمان بەرۋدى تاپسىردى.
"بۇل - حالىق كوپ كۇتكەن جوبا. جىلدار بويى جوندەۋ كورمەگەن شاعىن اۋداردىڭ ىشكى جوندەۋ جۇمىستارى حالىقتىڭ ۇسىنىس تىلەكتەرىن ەسكەرە وتىرىپ جاسالۋ كەرەك. اسىعۋدىڭ قاجەتى جوق. باستىسى ساپاسىنا ءمان بەرىڭدەر", — دەدى س.ترۇموۆ.
"ادىرنا" ۇلتتىق پورتالى.
