قارجىلىق مونيتورينگ اگەنتتىگىنىڭ الماتى قالاسى بويىنشا اۋماقتىق دەپارتامەنتى "QAMQOR" جەدەل الدىن الۋ ءىس-شاراسى اياسىندا الماتى وبلىسى ءبىلىم باسقارماسىنىڭ «№1 الماتى وبلىستىق بالالار ءۇيى» قمم ديرەكتورى مەن قىزمەتكەرىنە قاتىستى سوتقا دەيىنگى تەرگەپ - تەكسەرۋدى اياقتادى، دەپ حابارلايدى «ادىرنا» ءتىلشىسى قر قما ءباسپاسوز قىزمەتىنە سىلتەمە جاساپ.
تەرگەۋ بارىسىندا بالالار ءۇيىنىڭ الەۋمەتتىك پەداگوگى م. مۇستافينا ءوزىنىڭ قىزمەتتىك جاعدايىن پايدالانىپ، وزىنە سەنىپ تاپسىرىلعان 67 ميلليون تەڭگە سوماسىنداعى اقشالاي جاردەماقىنى جىمقىرعانى دالەلدەندى.
سوتتالعان مۇستافينا الەۋمەتتىك پەداگوگ جانە بالالار ءۇيىنىڭ باسشىسىنان قامقورشىنىڭ مۇددەلەرىن بىلدىرۋگە سەنىمحاتى بولا وتىرىپ، تاربيەلەنۋشىلەرگە اسىراۋشىسىنان ايرىلۋى جانە مۇگەدەكتىگى بويىنشا جاردەماقى رەسىمدەپ، سونداي-اق ەكىنشى دەڭگەيدەگى بانكتەردە ولارعا كارتوچكالىق شوتتار اشقان.
تاربيەلەنۋشىلەردىڭ ەسەپ ايىرىسۋ شوتتارىنا تولىق قول جەتكىزىپ، ءموبيلدى بانكينگ ارقىلى بالالار ءۇيى تاربيەلەنۋشىلەرىنىڭ ەسەپ ايىرىسۋ شوتتارىنان جەكە كارتوچكالىق شوتقا اقشا قاراجاتىن اۋدارىمداردى جۇزەگە اسىرعان، سونداي-اق تاربيەلەنۋشىلەردىڭ بانك كارتالارىن پايدالانا وتىرىپ، بانكوماتتاردان كەيبىر قاراجاتتى العان.
مۇنداي زاڭسىز قىزمەتپەن سوتتالعان ادام 2015 جىلدىڭ جەلتوقسانىنان 2020 جىلدىڭ تامىزىنا دەيىن اينالىسقان.
ءوز كەزەگىندە بالالار ءۇيىنىڭ ديرەكتورى ع. قوندىباەۆا 2018 جىلدىڭ كۇزىندە مۇستافينانىڭ ۇرلاۋ فاكتىلەرى تۋرالى ءبىلىپ، ونى ۋاكىلەتتى ورگانداردان جاسىرىپ، ونى قىزمەتىنەن شەتتەتپەي جانە بالالار ءۇيى تاربيەلەنۋشىلەرىنىڭ شوتتارىنا قول جەتكىزۋىن شەكتەمەگەن.
سوتتالۋشىلار ءوز كىناسىن مويىندادى. قازىرگى ۋاقىتتا 10 ميلليون تەڭگەدەن استام شىعىن بالالار ءۇيى تاربيەلەنۋشىلەرىنىڭ پايداسىنا وتەلدى.
سوت 52,4 ميلليون تەڭگە كولەمىندەگى قالعان سومانى جابىرلەنۋشىلەرگە قايتارۋدى مىندەتتەدى.
سوت ۇكىمىمەن م.مۇستافينا قر قك 189-بابى (اسا ءىرى مولشەردە سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ) بويىنشا كىنالى دەپ تانىلىپ، 7 جىل باس بوستاندىعىنان جانە 10 جىل مەرزىمگە پەداگوگيكالىق قىزمەتپەن اينالىسۋ قۇقىعىنان ايىرۋ تۇرىندە جازا تاعايىندالدى.
گ.قوندىباەۆا قر قك 371-بابى (سالعىرتتىق) بويىنشا كىنالى دەپ تانىلدى. مەملەكەتتىك لاۋازىمدا قىزمەت اتقارۋ قۇقىعىنان ايىرا وتىرىپ، وعان 2,7 ميلليون تەڭگە سوماسىندا ايىپپۇل تاعايىندالدى.
«ادىرنا» ۇلتتىق پورتالى
