قوستاناي وبلىسىندا Lada اۆتوكولىكتەرىنىڭ بارلىق مودەلدەرى شىعارىلادى. سونىمەن بىرگە مۇندا كاماز جۇك كولىگىنىڭ جاڭا ۇلگىسى قۇراستىرىلماق.
پرەمەر-ءمينيستردىڭ ورىنباسارى رومان سكليار مەن رەسەيدىڭ ونەركاسىپ جانە ساۋدا مينيسترلىگىنىڭ وكىلى دەنيس پاك قوستاناي وڭىرىندەگى وندىرىستىك كووپەراتسيانىڭ الەۋەتىن بارلادى. ۇكىمەتتىڭ ءباسپاسوز قىزمەتى حابارلاعانداي، وتاندىق زاۋىتتا كولىكتەرگە قاجەت شاناق ءوندىرىسىنىڭ تەحنولوگياسى يگەرىلىپ جاتىر. بۇدان بولەك، رومان سكليار كاماز كومپانياسىنىڭ باس ديرەكتورىمەن بىرگە جاڭا زاۋىت قۇرىلىسىنىڭ بارىسىمەن تانىستى. مۇندا جۇك كولىگىنىڭ جاڭا مودەلىنە ارنالعان شويىن قۇيماسى كومپونەنتتەرىن شىعارۋ جوسپارلانىپ وتىر. بۇل 600-دەن استام جاڭا جۇمىس ورنىن قۇرۋعا مۇمكىندىك بەرمەك. جوبانىڭ ينۆەستيتسيالىق قۇنى شامامەن 82 ملرد تەڭگە. ساپار قورىتىندىسى بويىنشا تاراپتار قازاقستاندا ينۆەستيتسيالىق جوبالاردى ىسكە اسىرۋ جونىندەگى 8 بىردەي قۇجاتقا قول قويدى.
