سولتۇستىك قازاقستان وبلىسىنىڭ جامبىل اۋدانىندا تۇراتىن اسىل احمەتوۆا 12 جاسىنان بەرى اتتان تۇسپەي مال باعىپ كەلەدى. كەيىنگى كەزدەرى اۋىلدىڭ شىنايى ءومىرىن بەينەلەگەن جىلقىشى قىزدىڭ جازبالارى كوپشىلىك قىزىعۋشىلىعىن ارتتىرا ءتۇستى. سايگۇلىك جاراتىپ، بايگەگە شاپقان بويجەتكەنگە سۇيسىنگەن شەتەلدىكتەر اققايىڭدار ولكەسىنە كەلۋدى ارماندايدى، دەپ حابارلايدى «ادىرنا» ءتىلشىسى «Qazaqstan» ۇلتتىق ارناسىنا سىلتەمە جاساپ.
جاستايىنان قىلقۇيرىقتى جانۋاردىڭ بابىن تاپقان بويجەتكەن قالانى تاستاپ، اۋىلعا كەلگەنىنە ەش وكىنبەيدى.
اۋىلدا 7 ءۇيىر جىلقى بار. اسىل قىسى-جازى سونىڭ بارلىعىن جالعىز ءوزى باعا بەرەدى. اتتىڭ قۇلاعىندا ەركىن وينايتىن بويجەتكەن بايگەلەرگە دە قاتىسىپ ءجۇر ەكەن.
اسىل ينفورماتيكا ءپانىنىڭ مۇعالىمى. جۇمىستان تىس ۋاقىتتا جىلقى باعىپ، بيە بايلايدى. قولى قالت ەتسە، ۇلتتىق ءداستۇر، تۋعان اۋىلى جايلى بەينەروليكتەر تۇسىرەدى. ماقساتى - قازاقتىڭ ءداستۇر-سالتىن دارىپتەۋ.
– ەكى اتىم بار، مۇنىڭ اتى زالەتنىي، ەكىنشىسى دجۋنگلي. بۇل مەنىڭ نەگىزى بايگەگە شاباتىن اتىم. كىشكەنتاي كەزىمنەن باستاپ جىلقىعا دەگەن ءبىر ەرەكشە ماحابباتىم وياندى دەپ ايتسا بولادى. ءوزىم ىلعي قاستارىندا جۇرگىم كەلەدى. ءبىر بايلانىس بولىپ تۇرادى ارامىزدا، - دەدى اسىل احمەتوۆا.
قىستىڭ ۇسكىرىك ايازى مەن جازدىڭ اپتاپ ىستىعىندا مال باعۋ وڭاي شارۋا ەمەس. دەگەنمەن جىلقى مالىنىڭ قادىر- قاسيەتىن تانىپ وسكەن اسىل بۇل كەدەرگىلەردى وڭاي ەڭسەرىپ كەلەدى. اسىل ءۇشىن ۇيىردەگى ءار جىلقىنىڭ ورنى بولەك. ارقايسىسىنىڭ مىنەزىن بىلەدى. سەبەبى قۇلىن كەزىنەن باپتاعان. ءتۇسىرىلىم كەزىندە ەكى بيە قۇلىنداپ، جەتى ءۇيىر جىلقىنىڭ قاتارى تاعى كوبەيدى.
اسىلدىڭ اكەسى ەسەنعالي احمەتوۆتىڭ سوزىنشە، ول كىشكەنتاي كەزىنەن جىلقىنى جاقسى كورەدى. 5 جاسىنان باستاپ اتقا وتىرعىزعان ەكەن.
دالانىڭ توسىندە ەركىن تىنىستاعان اسىلدىڭ جانى جاساندىلىقتى سۇيمەيدى. وزگە قىزدار سىندى وپا-دالاپ، اشەكەي بۇيىم جىلتىراققا قىزىقپايدى. باستاپقىدا اناسى ەركە وسكەن قىزىنىڭ ەر ازاماتتىڭ جۇمىسى دەپ قۇرىق ۇستاۋىنا قارسى بولىپتى.
– اكەسىنە تارتقان، بولمايدى جىلقى-جىلقى دەپ، بارام-بارام دەپ. سوسىن ەندى بالانىڭ كوڭىلى قالاعاسىن جارايدى دەدىك. وقۋدان كەلگەندە، جول ءجۇرىپ كەلگەندە، جىلقىنى سۇرايدى. ۇيگە كىرمەسە دە، سول ءبىرىنشى جىلقىعا بارادى، - دەدى ءمارزيا احمەتوۆا.
اسىل بولاشاقتا اۋىلدى دامىتىپ، ۇلتتىق ءداستۇردى ناسيحاتتاۋ ءۇشىن تۋريستىك ورتالىق اشقىسى كەلەدى. سونداي-اق جىلقىشى قىز جەلمەن جارىسقان سايگۇلىكتەرىمەن بىرگە تاريحي كينوعا ءتۇسۋدى دە ارماندايدى.
«ادىرنا» ۇلتتىق پورتالى
