24 jastaǵy boıjetken jeti úıir jylqyny jalǵyz ózi baǵyp júr

3282
Adyrna.kz Telegram

Soltústik Qazaqstan oblysynyń Jambyl aýdanynda turatyn Asyl Ahmetova 12 jasynan beri attan túspeı mal baǵyp keledi. Keıingi kezderi aýyldyń shynaıy ómirin beınelegen jylqyshy qyzdyń jazbalary kópshilik qyzyǵýshylyǵyn arttyra tústi. Sáıgúlik jaratyp, báıgege shapqan boıjetkenge súısingen sheteldikter aqqaıyńdar ólkesine kelýdi armandaıdy, dep habarlaıdy «Adyrna» tilshisi «Qazaqstan» ulttyq arnasyna silteme jasap.

Jastaıynan qylquıryqty janýardyń babyn tapqan boıjetken qalany tastap, aýylǵa kelgenine esh ókinbeıdi.

Aýylda 7 úıir jylqy bar. Asyl qysy-jazy sonyń barlyǵyn jalǵyz ózi baǵa beredi. Attyń qulaǵynda erkin oınaıtyn boıjetken báıgelerge de qatysyp júr eken.

Asyl ınformatıka pániniń muǵalimi. Jumystan tys ýaqytta jylqy baǵyp, bıe baılaıdy. Qoly qalt etse, ulttyq dástúr, týǵan aýyly jaıly beınerolıkter túsiredi. Maqsaty - qazaqtyń dástúr-saltyn dáripteý.

– Eki atym bar, munyń aty Zaletnyı, ekinshisi Djýnglı. Bul meniń negizi báıgege shabatyn atym. Kishkentaı kezimnen bastap jylqyǵa degen bir erekshe mahabbatym oıandy dep aıtsa bolady. Ózim ylǵı qastarynda júrgim keledi. Bir baılanys bolyp turady aramyzda, - dedi Asyl Ahmetova.

Qystyń úskirik aıazy men jazdyń aptap ystyǵynda mal baǵý ońaı sharýa emes. Degenmen jylqy malynyń qadir- qasıetin tanyp ósken Asyl bul kedergilerdi ońaı eńserip keledi. Asyl úshin úıirdegi ár jylqynyń orny bólek. Árqaısysynyń minezin biledi. Sebebi qulyn kezinen baptaǵan. Túsirilim kezinde eki bıe qulyndap, jeti úıir jylqynyń qatary taǵy kóbeıdi.

Asyldyń ákesi Esenǵalı Ahmetovtiń sózinshe, ol kishkentaı kezinen jylqyny jaqsy kóredi. 5 jasynan bastap atqa otyrǵyzǵan eken.
Dalanyń tósinde erkin tynystaǵan Asyldyń jany jasandylyqty súımeıdi. Ózge qyzdar syndy opa-dalap, áshekeı buıym jyltyraqqa qyzyqpaıdy. Bastapqyda anasy erke ósken qyzynyń er azamattyń jumysy dep quryq ustaýyna qarsy bolypty.

– Ákesine tartqan, bolmaıdy jylqy-jylqy dep, baram-baram dep. Sosyn endi balanyń kóńili qalaǵasyn jaraıdy dedik. Oqýdan kelgende, jol júrip kelgende, jylqyny suraıdy. Úıge kirmese de, sol birinshi jylqyǵa barady, - dedi Márzııa Ahmetova.

Asyl bolashaqta aýyldy damytyp, ulttyq dástúrdi nasıhattaý úshin týrıstik ortalyq ashqysy keledi. Sondaı-aq jylqyshy qyz jelmen jarysqan sáıgúlikterimen birge tarıhı kınoǵa túsýdi de armandaıdy.

«Adyrna» ulttyq portaly

Pikirler