"Qazaq Titan" اتىمەن تانىمال 24 جاستاعى المات جۇمانوۆ ۇشاق سۇيرەپ، قازاقستاننىڭ رەكوردتار كىتابىنا ەنۋگە تىرىستى دەپ حابارلايدى "ادىرنا" ۇلتتىق پورتالى "استانا" تەلەارناسىنا سىلتەمە جاساپ.
تەلەارنا مالىمەتىنشە، اۋە كەمەسىنىڭ جالپى سالماعى — 16 توننا. بيىكتىگى — 8,4 مەتر. جۇمانوۆ بۇل باستاماسىن تاۋەلسىزدىك 30 جىلدىعى مەن توكيو وليمپياداسىنىڭ قاتىسۋشىلارىنا ارناعان.
دەگەنمەن سپورتشىنىڭ سوزىنشە، بۇل بەلەستى باعىندىرۋعا كوپ ۋاقىت جۇمساماعان. مۇنداي باتىل شەشىمدى وسىدان 2 اي بۇرىن قابىلداعان.
المات مۇنداي سپورتپەن 10 جاسىنان باستاپ اينالىسقان. بۇعان دەيىن ناۋرىزدا 100 توننالىق ۆاگوندى 8 جارىم مەترگە دەيىن سۇيرەپ، قازاقستان گيننەستەر كىتابىنا ەنگەن بولاتىن. مۇنىمەن توقتاماي، ارقاسىنا 300 كەلىلىك تۇيە سالىپ، ءۇش كولىكتى سۇيرەپ، ەرەكشە ادامداردىڭ قاتارىنا ەكىنشى رەت ەنگەن. بىراق بۇل جولعى ناتيجە رەكوردتار كىتابىنا ەنۋگە جەتكىلىكسىز بولدى.
"بىزدە ەشقانداي رەتتەۋ، ولشەۋ دەگەن بولعان جوق. تەحنيكالىق اقاۋلار بولدى رەكوردتى تولىق جاساۋعا دەپ ويلايمىن. بىراق تا بۇل بىرىنشىدەن رەكورد ەمەس. ەكىنشىدەن، مۇنى تىركەمەيمىز", - دەدى قازاقستان رەكوردتار كىتابىنىڭ رەسمي وكىلى قۋاندىق قۇدايبەرگەنوۆ.
المات جۇمانوۆتىڭ بۇل جولى ۇشاقتى 30 سانتيمەترگە سۇيرەگەن. جالپى، بۇعان دەيىن 16 توننالىق ۇشاقتى 30 مەترگە تارقان رەسەيلىك اتلەت بولعان ەكەن. ول الداعى ايدا 65 توننالىق اۋە كەمەسىن سۇيرەۋگە ءوتىنىش بەرىپتى.
"سوڭعىسىنا كۇشىم جەتپەي قالدى. جاڭاعى 1-2 مۇمكىندىكپەن كۇشىم كەتىپ قالدى. تارتقانىمنىڭ ءوزى مەن ءۇشىن رەزۋلتات. ويتكەنى، مۇندايدى تارتۋ وڭاي ەمەس", - دەدى ا.جۇمانوۆ.
"ادىرنا" ۇلتتىق پورتالى.
