بۇگىنگى تاڭدا 83 جىلدىق تاريحى بار الماتى قالاسىنىڭ مەملەكەتتىك قۋىرشاق تەاترى – رەسپۋبليكامىزداعى ەڭ ءىرى ونەر ۇجىمدارىنىڭ ءبىرى. ونەر وشاعى بۇگىندە تالانتتى ارتيستەر مەن قۋىرشاق شەبەرلەرىنىڭ، رەجيسسەرلەردىڭ، سۋرەتشىلەردىڭ بىرنەشە ۇرپاعىن تاربيەلەپ شىعاردى. ەلىمىزدە جانە شەت ەلدە وتكەن حالىقارالىق، رەسپۋبليكالىق تەاتر فەستيۆالدەرىندە بيىك بەلەستەردى باعىندىرعان ۇجىمنىڭ العا قويعان
باعىتى مەن باعدارى دا ايقىن. ول – قازاقتىڭ قۋىرشاق تەاترى ونەرىن وركەندەتۋ، كەشەگى مەن بۇگىنگى ءومىر اراسىن ونەردىڭ بيىك شىڭى ارقىلى شىنايى كورسەتە ءبىلۋ.
بولاشاعىمىزدىڭ جارقىن، كەلەر ۇرپاقتىڭ ءبىلىمدى، ساليقالى بولۋى بالا تاربيەسىنە تىكەلەي بايلانىستى ەكەنى حاق. سول سەبەپتى دە، الەمدىك باسەكەگە ساي، رۋحاني تۇرعىدان باي، جان-جاقتى، ءبىلىمپاز ۇرپاق تاربيەلەۋ جولىندا قۋىرشاق تەاترى ايانباي ەڭبەك ەتۋدە. ونەر ورداسى 82-ءشى ماۋسىمىن جاپپاستان ۇزدىكسىز جۇمىس اتقارىپ، ءوز كورەرمەندەرىن كۇندەلىكتى قويىلىمدارىمەن قاۋىشتىردى. كوپتەگەن الەۋمەتتىك جاعدايى ناشار، مۇگەدەك بالالارعا قايىرىمدىلىق تەگىن كورسەتىلىمدەرىن ۇيىمداستىرۋدى تەاتر ۇجىمى ايلىق جۇمىس جوسپارىنا تۇراقتى تۇردە ەنگىزگەن.
83 ماۋسىمىن «انا جۇرەگى» سپەكتاكلىنىڭ پرەمەراسىمەن اشقان ونەر ورداسى جاڭا جىل مەرەكەسىنىڭ قارساڭىندا كورەرمەن نازارىنا كەزەكتى «سۋ استى پاتشالىعىنداعى جاڭا جىل» (اۆت.: ا.سەرگەەۆ، رەج.: و.اقجارقىن-سارسەنبەك) ەرتەگىسىنىڭ پرەمەراسىن ۇسىندى. كوڭىلدى ءارى جارقىن قويىلىم بارىسىندا كىشكەنتاي كورەرمەندەر اكۆاحانشايىم ينفانتا، ۆالۋن پاتشا جانە ونىڭ ءۋازىرى سكۋبامەن بىرگە سۋ استىنا ساياحات جاساپ، جاڭا جىلدى قارسى الۋ ءۇشىن ءار ءتۇرلى شىتارمان وقيعالاردان ءوتتى.
مەرەكەلىك باعدارلاما 20 جەلتوقسان مەن 15 قاڭتار ارالىعىندا وتكىزىلەدى. تەاترعا كەلگەن ءار كورەرمەندى تەاتر فويەسىندە اياز اتا، اقشاقار، تەڭىز قاراقشىسى، توتىقۇس، جۇلدىز، يت، تاۋىق، ت.ب. ەرتەگى كەيىپكەرلەرى قۇشاق جايا قارسى الىپ، جاسىل شىرشا اينالاسىندا ءان سالدىرىپ، بي بيلەتىپ، ءار ءتۇرلى ويىندار ويناتا وتىرىپ، مەرەكەلىك كوڭىل كۇيگە بولەۋدە.
گۇلىم كوپبايقىزى
