بۇگىن قازاقستان رەسپۋبليكاسىنىڭ قورعانىس ءمينيسترى، گەنەرال-لەيتەنانت نۇرلان ەرمەكباەۆ ءوزىنىڭ تاجىكستاندىق ارىپتەسى، گەنەرال پولكوۆنيك شەرالي ميرزوعا تەلەفون سوعىس، ءوزارا اقپارات الماسىپ، پىكىرلەستى. تەلەفون سوعۋدىڭ باستى تاقىرىبى اۋعان تاجىك شەكاراسى ماڭىنداعى جاعدايدى باعامداۋ بولاتىن. سونىمەن قاتار قوس ەلدىڭ قورعانىس مينيسترلەرى دۋشانبە قالاسىندا وتەتىن شانحاي ىنتىماقتاستىق ۇيىمىنا مۇشە مەملەكەتتەردىڭ قورعانىس مينيسترلەرى اراسىنداعى كەزدەسۋ ماسەلەسىن دە تالقىلادى. قازاقستان تاراپى تاجىكستانعا شەكاراسىن قورعاۋ بويىنشا كومەكتەسۋگە ءازىر ەكەنىن جەتكىزدى.
مامىر ايىنان باستاپ اۋعانستاندا جاعداي كۇرت ناشارلاپ كەتتى. وعان باتىستىق كواليتسيانىڭ ەلدەن شىعاتىنى جايلى اقپاراتى سەبەپكەر بولعان ەدى. بايدەن اكىمشىلىگى ترامپ باستاعان باستامانى ءىس جۇزىندە جۇزەگە اسىرىپ، اقش اسكەرىن اۋعانستاننان الىپ كەتەتىنىن جاريالاعان بولاتىن. العاشقى لەگى مامىر ايىندا شىعارىلا باستادى. بۇل اقپارات اۋعانستانداعى تەررورلىق توپتاردىڭ كۇش الۋىنا نەگىز بولدى. اتاپ ايتقاندا «تاليبان» قوزعالىسى بيلىككە قارسى اسكەري قيمىلدارىن ەسەلەپ ارتتىرىپ، جاۋلاپ الۋدى ىسكە اسىرۋدا. ولار ەلدىڭ 70 پايىز اۋماعىنا جۋىق جەردى وزدەرىنىڭ باعىنىشتى ايماعىنا اينالدىرعان. ءبىز ءۇشىن ەڭ قاۋىپتىسى تالىبتەردىڭ تاجىك-اۋعان، تۇركىمەن-اۋعان، وزبەك-تۇركىمەن شەكاراسىن ءوز باقىلاۋلارىنا الۋى. وسىلايشا ولار تۇتاستاي ورتالىق ازيا شەكاراسىن ءوز باقىلاۋلارىنا الىپ، ايماقتىق قاۋىپسىزدىككە قاۋىپ توندىرۋدە.
ورتالىق ازيا مەملەكەتتەرى بۇل قاۋىپتى ناقتى سەزىنۋدە. 1992-1997 جىلدارى تاجىكستاندا ازامات سوعىسى بولىپ، ايماقتىق قاۋىپسىزدىكتى شايقاپ ءوتتى. ازامات سوعىسىنان مىڭداعان ادام بوسقىن بولىپ، قازاقستانعا دا كەلدى. تاجىكستانداعى جاعدايدى تۇراقتاندىرۋ ماقساتىندا قازاقستان ارنايى بىتىمگەرلىك كۇشتەرىن تاجىك جەرىنە جىبەردى. جالپى تاجىكستاندا 10500 ساربازىمىز اتتانىپ، ونىڭ 57-ءسى قازا تاپتى. قازاقستان بۇل قادامعا بارۋعا ءماجبۇر بولدى. سەبەبى ەلدىڭ قاۋىپسىزدىگى سول ايماقتا قورعالىپ جاتتى. مىنە، اراعا شيرەك عاسىر سالىپ سول قاۋىپ قايتا تونگەلى تۇر. ارينە، ءبىزدىڭ قورعانىس سالاسى ونىڭ الدىن الۋ ماقساتىندا جۇمىس جاساپ، اۋعانستانمەن شەكارالاساتىن ورتالىق ازيا مەملەكەتتەرىنە كومەك قولىن سوزۋعا دايىن ەكەنىن ناقتى بىلدىرۋدە. ەجەلگى تۇركىلەردە «كورشىڭنىڭ ءۇيى ورتەنسە ءوشىر، ءوز ءۇيىڭنىڭ ورتەنگەنىن قالاماساڭ» دەگەن ءسوز بولعان. سوندىقتان ول دانالىقتى ۇمىتپاعان ءبىزدىڭ مەملەكەت، وتتىڭ بەرى ءوتىپ كەتپەۋىنە بارىن سالادى. ناقتى ىسپەن، جۇيەلى ارەكەتپەن. تاۋەلسىزدىك جىلدارى قۇرىلعان قورعانىس سالاسى وعان تولىق دايىن، قاشانداي ساقاداي ساي تۇر.
"ادىرنا" ۇلتتىق پورتالى
