Búgin Qazaqstan Respýblıkasynyń qorǵanys mınıstri, general-leıtenant Nurlan Ermekbaev óziniń tájikstandyq áriptesi, general polkovnık Sheralı Mırzoǵa telefon soǵys, ózara aqparat almasyp, pikirlesti. Telefon soǵýdyń basty taqyryby aýǵan tájik shekarasy mańyndaǵy jaǵdaıdy baǵamdaý bolatyn. Sonymen qatar qos eldiń qorǵanys mınıstrleri Dýshanbe qalasynda ótetin Shanhaı Yntymaqtastyq Uıymyna múshe memleketterdiń qorǵanys mınıstrleri arasyndaǵy kezdesý máselesin de talqylady. Qazaqstan tarapy Tájikstanǵa shekarasyn qorǵaý boıynsha kómektesýge ázir ekenin jetkizdi.
Mamyr aıynan bastap Aýǵanstanda jaǵdaı kúrt nasharlap ketti. Oǵan Batystyq koalıııanyń elden shyǵatyny jaıly aqparaty sebepker bolǵan edi. Baıden ákimshiligi Tramp bastaǵan bastamany is júzinde júzege asyryp, AQSh áskerin Aýǵanstannan alyp ketetinin jarııalaǵan bolatyn. Alǵashqy legi mamyr aıynda shyǵaryla bastady. Bul aqparat Aýǵanstandaǵy terrorlyq toptardyń kúsh alýyna negiz boldy. Atap aıtqanda «Talıban» qozǵalysy bılikke qarsy áskerı qımyldaryn eselep arttyryp, jaýlap alýdy iske asyrýda. Olar eldiń 70 paıyz aýmaǵyna jýyq jerdi ózderiniń baǵynyshty aımaǵyna aınaldyrǵan. Biz úshin eń qaýiptisi tálibterdiń tájik-aýǵan, túrkimen-aýǵan, ózbek-túrkimen shekarasyn óz baqylaýlaryna alýy. Osylaısha olar tutastaı Ortalyq Azııa shekarasyn óz baqylaýlaryna alyp, aımaqtyq qaýipsizdikke qaýip tóndirýde.
Ortalyq Azııa memleketteri bul qaýipti naqty sezinýde. 1992-1997 jyldary Tájikstanda azamat soǵysy bolyp, aımaqtyq qaýipsizdikti shaıqap ótti. Azamat soǵysynan myńdaǵan adam bosqyn bolyp, Qazaqstanǵa da keldi. Tájikstandaǵy jaǵdaıdy turaqtandyrý maqsatynda Qazaqstan arnaıy bitimgerlik kúshterin tájik jerine jiberdi. Jalpy Tájikstanda 10500 sarbazymyz attanyp, onyń 57-si qaza tapty. Qazaqstan bul qadamǵa barýǵa májbúr boldy. Sebebi eldiń qaýipsizdigi sol aımaqta qorǵalyp jatty. Mine, araǵa shırek ǵasyr salyp sol qaýip qaıta tóngeli tur. Árıne, bizdiń qorǵanys salasy onyń aldyn alý maqsatynda jumys jasap, Aýǵanstanmen shekaralasatyn Ortalyq Azııa memleketterine kómek qolyn sozýǵa daıyn ekenin naqty bildirýde. Ejelgi túrkilerde «kórshińniń úıi órtense óshir, óz úıińniń órtengenin qalamasań» degen sóz bolǵan. Sondyqtan ol danalyqty umytpaǵan bizdiń memleket, ottyń beri ótip ketpeýine baryn salady. Naqty ispen, júıeli áreketpen. Táýelsizdik jyldary qurylǵan qorǵanys salasy oǵan tolyq daıyn, qashandaı saqadaı saı tur.
"Adyrna" ulttyq portaly
