اقتاۋ قالاسىندا 23 شىلدەدەن باستاپ ىستامبۇل-اقتاۋ-ىستامبۇل باعىتى بويىنشا جاڭا رەيس ىسكە قوسىلدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
اقتاۋ قالاسى دەمالعىسى، بيزنەس جۇرگىزگىسى جانە كاسپي جاعالاۋى مەن ونىڭ اينالاسىنداعى كورىكتى جەرلەردىڭ اسەمدىگىن كورگىسى كەلەتىن تۋريستەر ءۇشىن، سونداي-اق ينفراقۇرىلىمعا ينۆەستيتسيا سالۋعا نيەتى بار ازاماتتارعا زور مۇمكىندىك بەرەدى. جاڭادان اشىلعان اۋە رەيسى وسىلايشا بۇكىل الەمدى اقتاۋ قالاسىمەن بىرىكتىرۋگە ىقپال ەتپەك.
“سوڭعى 10-15 جىلدا ماڭعىستاۋ وبلىسى شەتەلدىك ينۆەستورلار ءۇشىن ەڭ تارتىمدى ايماقتاردىڭ ءبىرى بولدى. سونىمەن قاتار، ماڭعىستاۋ وبلىسى - بۇل ەلدىڭ تۋريستىك الەۋەتىن دامىتۋدىڭ نەگىزگى باعىتى. العا قويىلعان ماقساتتارعا جەتۋ جانە ەكونوميكا دەڭگەيىن كوتەرۋ ءۇشىن وبلىستىڭ كولىك الەۋەتىن دامىتۋ قاجەت. ۇزاق قاشىقتىق، جىلدامدىق، قامتاماسىز ەتىلگەن جايلىلىق جانە باسقا دا فاكتورلار، ەڭ الدىمەن، اۋە كولىگىنىڭ دامۋىنا ىقپال ەتەدى. ماڭعىستاۋ وبلىسىنىڭ گەوگرافيالىق ورنالاسۋى ودان ءارى ينتەرمودالدىق تاسىمالداۋ جۇيەسىنىڭ دامۋىنا ىقپال ەتەدى (كولىكتىڭ بارلىق تۇرلەرىنىڭ بولۋى: اۆياتسيا، تەڭىز، تەمىرجول، اۆتوموبيل جولدارى”،- دەيدى ماڭعىستاۋ وبلىسىنىڭ اكىمى س.ترۇموۆ.
اقتاۋ اۋەجايى - باتىس قازاقستانداعى حاب اۋەجايى. ىشكى رەيستەردىڭ ترانزيتتىك جولاۋشىلارىنىڭ (اتىراۋ، شىمكەنت، كوكشەتاۋ، ورال، اقتوبە) ماسكەۋ، ىستامبۇل، باكۋ ارقىلى كەز كەلگەن جەرگە جەتۋگە مۇمكىندىگى بار.
سونىمەن قاتار، اقتاۋ اۋەجايى كاسپي ماڭىنداعى قالالارمەن، كاۆكازبەن، گرۋزيامەن، ارمەنيامەن تىعىز بايلانىسقا يە. جاڭادان اشىلىپ وتىرعان رەيس ارقىلى ماڭعىستاۋ تۇرعىندارى ەجەلگى تاريحى بار ىستامبۇل قالاسىنا كەرەمەت ساياحات جاساي الادى.
ىستامبۇل-اقتاۋ-ىستامبۇل باعىتى بويىنشا جاڭا رەيس «Turkish Airlines اۆياكومپانياسىنىڭ "A320 Neo" اۋە كەمەسىمەن 23 شىلدەدەن باستاپ اپتاسىنا ەكى رەت سەيسەنبى جانە جۇما كۇندەرى ۇشادى.
"ادىرنا" ۇلتتىق پورتالى.
