بالالار ورتالىعىندا جارىلىس بولدى! وقىس جايت قىزىلوردادا تىركەلدى. تۇرعىندارى تاڭعى 7 شاماسىندا قاتتى دىبىستان شوشىپ ويانعان. دالاعا اتىپ شىققان ولار ءۇي جانىنداعى ۇل-قىزدارعا ارنالعان نىساننىڭ وتقا ورانعانىن كورىپتى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
وقىس وقيعا تاڭعى 7:20 شاماسىندا بولعان. جارىلىستىڭ قاتتى بولعانى سونشا، ونىڭ تولقىنىنان جاقىن ماڭايداعى جەر ءۇيدىڭ اعاشتان سالىنعان سارايى قيراپ، 50 شارشى مەتر اۋماققا زاقىم كەلگەن. ودان بولەك، باستىرماسى قۇلاپ، شىعار ەسىكتى جاۋىپ قالىپتى. ءۇيدىڭ يەسىن كورشىلەرى تەرەزەدەن شىعارۋعا ءماجبۇر بولىپتى.
«جۇمىس جاقتان كەلە جاتقانمىن. سول كەزدە ەستۋىم بويىنشا گۇرس ەتە قالدى دەدى عوي ۇيدەگىلەر. مەن كەلگەندە ماشينالار بىلاي كەلىپ، مىنا جاقتان كەتىپ جاتىر ەكەن»، - دەيدى وقىس وقيعا كۋاگەرى باۋىرجان جارىلقاسىنوۆ.
ءورت سوندىرۋشىلەر وقيعا ورنىنا حابار تۇسىسىمەن 2 مينۋتتا جەتتىك دەپ وتىر. ويتكەنى، ءورت ءسوندىرۋ بەكەتىمەن ويىن ساۋىقتىرۋ ورتالىعىنىنىڭ اراسى 1,5 شاقىرىم عانا ەكەن. جەدەل جەتكەن توتەنشەلىكتەر عيماراتتىڭ 1-ءشى قاباتى تولىقتاي وتقا ورانعان كورگەن. ولار ءتىلسىز جاۋدى ءسوندىرىپ بىتكەنشە عيماراتتىڭ ءبىرىنشى قاباتىنداعى 200 شارشى مەتر اۋماقتىڭ دىمى قالماي جانىپ كەتكەن.
«وقيعا ورنىنا جۇمىلدىرىلعان جەكە قۇرام جانە تەحنيكانىڭ ارقاسىندا تولىعىمەن ءورت 08:15 مينۋتتا جويىلىپ، سالدارىنان كورشى ورنالاسقان جەڭىس كوشەسى 20 تۇرعىن ءۇيدىڭ 3 تەرەزەسى جانە اۋلاسىندا ورنالاسقان سارايدىڭ قۇلاعانى انىقتالدى. قازىرگى تاڭدا ءورتتىڭ شىعۋ سەبەپتەرى انىقتالۋدا. ورتكە جالپى قاتىستىرىلعان 10 تەحنيكا مەن 44 قىزمەتكەر»، - دەيدى قىزىلوردا وبلىستىق تجد ءورت ءسوندىرۋ كەزەكشى قىزمەتىنىڭ جەدەل كەزەكشىسى ءالي دۇيسەبەكوۆ.
«ادىرنا» ۇلتتىق پورتالى
