اتىراۋداعى جانايقاي!
مۇنداي باسسىزدىققا نە ءۇشىن جول بەرىلىپ وتىر...؟
تۋعان جەرىم اتىراۋداعى، اتاپ ايتسام اعىمداعى وسى جىلدىڭ مامىر ايىندا بالىق شارۋاشىلىعى كوميتەتىنىڭ جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسيا باسشىلىعىنىڭ جاۋاپسىز قىزمەتىنىڭ كەسىرىنەن توننالاپ ولگەن بالىقتاردى، ياعني تۇرمىسى ابدەن كەدەيلەنىپ ناشارلاعان حالىققا بەرگىسى كەلمەي، بوسقا شىرىتكەن نۇرلىبەك اسىلبەكۇلى عايسين دەگەن شەنەۋنىك زاڭدى تۇردە جازالانۋى بىلاي تۇرسىن، قىزمەتى كوتەرىلىپ، قر ەكولوگيا، گەولوگيا جانە تابيعي رەسۋرستار مينيسترلىگى اپپارات باسشىسىنىڭ بۇيرىعىمەن جاقىن ارادا جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ باسشىسى بولىپ تاعايىندالىپتى.
ءبىرىنشى قورشاعان ورتاعا زياندى، ياعني توننالاپ شىرىگەن بالىققا ۋتيليزاتسيا جاسالدى ما؟
ەكىنشىدەن، ەگەر ەكولوگيانى ساقتاۋ نورمالارىنا سايكەس ۋتيليزاتسيا جاسالعان بولسا، حالىق الدىندا نۇرلىبەك عايسين بالىقتىڭ جاپپاي ولۋىنە بايلانىستى تولىقتاي مالىمەت پەن ەسەپ بەرۋى كەرەك ەدى، سوعان وراي حالىققا تۇسىندىرمە جۇمىستارىن جاسادى ما؟
ۇشىنشىدەن اتىراۋ جۇرتىنىڭ بار بايلىعى بولىپ ەسەپتەلەتىن بالىقتىڭ جاپپاي قىرىلۋىنا جاۋاپتى ءتيىس، مەملەكەتتىك مەكەمەنىڭ باسشىسى بولۋعا نۇرلىبەك عايسيننىڭ ءبىلىمى مەن كاسىبي بىلىكتىلىگى قانشالىقتى ساي كەلەدى جانە قۇزىرلى ورگانداردىڭ تاراپىنان باسشىلىققا لايىقتى لاۋازىم تالاپتارى ەسكەرىلدى مە؟
مىسالى ماڭعىستاۋ مەن قىزىلوردا وڭىرلەرىندە جەرگىلىكتى بيلىكتىڭ ۋاقتىلى جۇتتىڭ الدىن الماۋىنىڭ كەسىرىنەن- جاپپاي مال قىرىلدى، ال اتىراۋداعى ماحامبەت اۋدانىنداعى مامىر ايىنداعى توننالاعان بالىق يت-قۇسقا جەم بولدى، جەمقورلىق پەن نەمقۇرايدىلىققا نەگىزدەلگەن وسىنداي "ەكولوگيالىق اپاتتاردىڭ" تاعى دا قايتالانبايتىنىنا كىم كەپىلدىك بەرە الادى؟
نەمەسە بۇنداي باسسىزدىق پەن سوراقىلىق قاشانعا دەيىن جالعاسادى؟
الدە ەلدە بولىپ جاتقان جۇت،قۇرعاقشىلىق، توپان سۋ ياكي قۋاڭشىلىق دەگەن كاتاكليزمدەردى ءتىلسىز تابيعاتقا جابا سالىپ، قاراپ وتىرامىز با؟
سول ءۇشىن مەن وسى ماسەلەگە بايلانىستى ۇكىمەت باسشىسى مەن قر ەكولوگيا، گەولوگيا جانە تابيعي رەسۋرستار مينيسترلىگىنە الەۋمەتتىك جەلى مەن باق ارقىلى رەسمي ساۋال جولدايمىن جانە تەز ارادا اتالمىش مەملەكەتتىك ورگانداردان اتىراۋ بالىق شارۋاشىلىعى ينسپەكتسياسىنىڭ باسشىسىنىڭ لاۋازىمى مەن كاسىبي ءىس-ارەكەتى، مەملەكەتتىك قىزمەت زاڭىنا قانشالىقتى سايكەس كەلەتىنى جونىندە تولىققاندى ناقتىلى جاۋاپ كۇتەمىن.
حالىقارالىق IFJ جۋرناليستەر
فەدەراتسياسىنىڭ مۇشەسى،
"دەموس"قب توراعاسى
تۇراربەك قۇسايىنوۆ
