قر پارلامەنتى ءماجىلىسىنىڭ دەپۋتاتى، ماجىلىستەگى فراكتسيا مۇشەسى گەننادي شيپوۆسكيح، «Nur Otan» پارتياسى ورتالىق اپپاراتىنىڭ قىزمەتكەرى گۇلنار نۇراحمەتحانوۆا جانە پارتيا اتىنان اۋىلىنىڭ اكىمدىگىنە ۇمىتكەر ەلميرا قازيەۆا اقاي اۋىلى تۇرعىندارىمەن كەزدەستى.
كارانتين تالاپتارىنا ساي اۋىلدىق كلۋب الدىندا وتكەن كەزدەسۋگە اۋىل تۇرعىندارى، اقسساقالدار، اۋىل جاستارى جينالدى.
كەزدەسۋدە ءسوز العان پارلامەنت ءماجىلىسىنىڭ دەپۋتاتى گ.شيپوۆسكيح 2025 جىلعا ارنالعان سايلاۋالدى باعدارلامانىڭ جول كارتاسى نەگىزىندە اتقارىلىپ جاتقان جانە جۇزەگە اسىرىلعان جۇمىستارعا توقتالىپ ءوتتى.
«قۇرمەتتى اۋىل تۇرعىندارى وزدەرىڭىزگە بەلگىلى پارتيانىڭ 5 جىلعا ارنالعان سايلاۋالدى باعدارلاماسىندا سىزدەردىڭ اۋىلعا قاتىستى دا ءبىراز شارۋالار ەنگىزىلگەن. قازىرگى ۋاقىتتا وبلىس بويىنشا جول كارتاسىنىڭ 16% جۇزەگە اسىرىلىپ وتىر. اتاپ ايتار بولسام 6000 عا جۋىق تۇرعىنى بار اقاي اۋىلدىق وكرۋگىندەگى ەلەكتر جەلىلەرىن كەڭەيتۋ جانە قايتا جاڭعىرتۋ جوباسى جۇزەگە اسىپ، ونىڭ يگىلىگىن ەل كورىپ وتىر»، - دەدى دەپۋتات.
كەزدەسۋگە الداعى وتەتىن اۋىل اكىمدەرىنىڭ تىكەلەي سايلاۋىنا اقاي اۋىلدىق وكرۋگىنە «Nur Otan» پارتياسىنان ۇمىتكەر قازيەۆا ەلميرا تۇرعىندارعا ءوزىنىڭ سايلاۋالدى باعدارلاماسىن جان-جاقتى تانىستىردى.
كەزدەسۋ بارىسىندا اۋىل تۇرعىندارى وزدەرىنىڭ تالاپ-تىلەكتەرى مەن ۇسىنىستارىن ايتتى.
