رەسەيلىك دارىگەرلەردىڭ شامامەن 20 پايىزى پاتسيەنتتەرگە COVID-19-قا قارسى ۆاكتسينا ەگۋگە كەڭەس بەرمەيتىنىن ايتقان دەپ حابارلايدى "ادىرنا" ۇلتتىق پورتالى "Forbes.ru-عا" سىلتەمە جاساپ.
دارىگەرلەر مەن مەدبيكەلەر اراسىندا جۇرگىزىلگەن ساۋالناماعا سايكەس، جاپپاي ۆاكتسيناتسيا ناۋقانىن دارىگەرلەردىڭ 62,9% -ى قولداعان، 17,5% -ى پاتسيەنتتەرگە ۆاكتسينا ەگۋ كەرەكتىگى تۋرالى ايتۋعا شەشىم قابىلداماعان. ال 19,6% -ى پاتسيەنتتەرگە ۆاكتسيناتسيالاۋدى ۇسىنبايتىندىعىن ايتقان.
مۇنداي ناتيجەلەردى "اكتيون مەديتسينا" قىزمەت كورسەتۋ ورتالىعى ءوز زەرتتەۋىندە كورسەتكەن. اتاپ ايتساق، زەرتتەۋ مەديتسينا سالاسىنىڭ 2400 ورتا بۋىن قىزمەتكەرلەرى (ورتا مەديتسينالىق قىزمەتكەرلەر مەن مەديتسينالىق قىزمەتكەرلەردى قوسا العاندا) جانە دارىگەرلەرى اراسىندا جۇرگىزىلگەن.
دارىگەرلەردىڭ كوپشىلىگى (74,5%) پاتسيەنتتەرىن COVID-19-قا قارسى ۆاكتسيناتسيالاۋعا كەڭەس بەرمەيتىنىن، سەبەبى رەسەيدەن شىققان ۆاكتسينالارعا سەنىمسىزدىكپەن قارايتىنىن تۇسىندىرگەن.
دارىگەرلەردىڭ جاۋاپتارىندا ۆاكتسينالاردىڭ وتە از سىنالعاندىعى، عىلىمي قاۋىمداستىقتىڭ ەكپەنىڭ جاناما اسەرلەرى تۋرالى ءالى حاباردار ەمەس ەكەندىگى، ەلدە شەتەلدىك ۆاكتسينالار جوقتىعى جانە ۆاكتسيناتسياعا بايلانىستى تىم بەلسەندى ناۋقان جۇرگىزىلىپ جاتقاندىعى ايتىلعان.
ۆاكتسيناتسيانى ۇسىنبايتىن ءاربىر ءتورتىنشى دارىگەر كوروناۆيرۋستىق ۆاكتسينادان بۇرىن جالپى ۆاكتسيناتسياعا قارسى ەكەندىگىن جەتكىزگەن.
ال پاتسيەنتتەردى ۆاكتسيناتسيالاۋعا كەڭەس بەرەتىن مامانداردىڭ كوپشىلىگى "Sputnik V-گە" سەنەدى ەكەن (64%), ال بىرقاتار دارىگەرلەر "كوۆيۆاك-قا" كەڭەس بەرەدى (25%). ال دارىگەرلەردىڭ 11 پايىزى "ەپيكۆاككورونا" ۆاكتسيناسىن قولداعان.
"ادىرنا" ۇلتتىق پورتالى.
