اتىراۋ وبلىسى اكىمى ماحامبەت دوسمۇحامبەتوۆ قر پارلامەنتى سەناتىنىڭ دەپۋتاتى عۇمار دۇيسەمباەۆپەن بىرگە قايتا جاڭعىرتۋ جۇمىستارى جۇرگىزىلىپ جاتقان رەسپۋبليكالىق ماڭىزى بار «اقتوبە-اتىراۋ-استراحان» اۆتوموبيل جولىنىڭ جوندەۋ جۇمىسىمەن تانىستى.
جالپى ۇزىندىعى 277 شاقىرىم بولاتىن جولدىڭ 60 شاقىرىمىن بيىل اياقتاۋ جوسپارلانعان. قازىرگى كەزدە ونىڭ 20 شاقىرىمى پايدالانۋعا بەرىلگەن. ال، قالعان 40 شاقىرىمىندا قىزۋ جۇمىس ءجۇرىپ جاتىر.
«قازاۆتوجول» اق ۇلتتىق كومپانياسى تاپسىرىس بەرگەن مەردىگەر مەكەمەلەردە 226 ادام تۇراقتى جۇمىسپەن قامتىلىپ، 78 ارنايى تەحنيكا جۇمىلدىرىلعان.
سونىمەن قاتار، قالعان 217 شاقىرىمدىق ۋچاسكەسىندە جولدىڭ نەگىزگى قاباتتارىن ورنالاستىرۋ، كوممۋنيكاتسيا جەلىلەرىن اۋىستىرۋمەن قاتار، 25 سۋ وتكىزەتىن قۇبىرلار جۇرگىزىلۋدە. بۇل ارالىقتى دا حالىققا ىڭعايلى بولۋى ءۇشىن مەرزىمىندە اياقتاۋعا كۇش سالىنۋدا. بەلگىلەنگەن اۋماقتاعى جۇمىستى 183 ارنايى تەحنيكامەن 367 ادام اتقارۋدا. وعان قوسا، جولدىڭ ساپاسىن انىقتايتىن زەرتحانالار دا جۇمىس ىستەۋدە.
مەردىگەر مەكەمەلەردىڭ باسشىلارىمەن تىلدەسىپ، جۇمىس بارىسىمەن تانىسىپ شىققان وبلىس اكىمى ماحامبەت دوسمۇحامبەتوۆ مەملەكەت باسشىسىنىڭ اۆتوكولىك جولدارى ماسەلەسىنە اسىرەسە، ساپاسىنا اسا ءمان بەرىپ وتىرعانىن اتاپ ءوتتى. سونىمەن قاتار، اكىمدىك تاراپىنان ماڭىزدى جوبانى جۇزەگە اسىرۋ ءۇشىن جان-جاقتى قولداۋ كورسەتىلەتىنىن جەتكىزدى. سوندىقتان جاۋاپتى مەردىگەر مەكەمەلەرگە جول قۇرىلىسىنىڭ زاماناۋي تالاپتارعا ساي بولۋىن، ساپالى ءارى قاۋىپسىزدىك ماسەلەسى ەسكەرىلە وتىرىپ بەلگىلەنگەن مەرزىمدە ءبىتۋىن ايرىقشا تاپسىردى.
ايتا كەتۋ كەرەك، 6 بولىك بويىنشا جوندەلىپ جاتقان جول قۇرىلىسى جۇمىستارىن 2022 جىلدىڭ سوڭىنا دەيىن اياقتاۋ جوسپارلانۋدا.
