قىرعىزستان مەن تاجىكستان شەكارادا بولعان تاعى ءبىر قارۋلى قاقتىعىستى تەكسەرۋگە كىرىستى. وسى وقيعا كەزىندە 27 جاستاعى قىرعىز شەكاراشىسى وققا ۇشتى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
رەسمي مالىمەتكە سايكەس، اتىس 8 شىلدە كۇندى كەشكى ساعات بەستىڭ كەزىندە چاشماگيلدان اسۋىنا جاقىن جەردە بولعان. قىرعىزستاننىڭ شەكارا قىزمەتى قارۋلى قاقتىعىستى تاجىك اسكەريلەرى باستادى دەپ وتىر.
«شامامەن، ساعات 17:00-دە قىرعىزستان رەسپۋبليكاسىنىڭ اتپەن جۇرەتىن شەكاراشىلار جاساعى باتكەن وبلىسى لەيلەك اۋدانىنداعى ناۋمين اسۋىنىڭ ماڭايىندا شەكارا بويىمەن قىزمەت اتقارعان. ال چاشماگيلدان اسۋىنىڭ جانىندا تاجىكستان شەكاراشىلارى كەنەتتەن شابۋىل جاسادى. جاراقات العان ادامدار بار»، - دەلىنگەن قىرعىستاننىڭ شەكارا قىزمەتى تاراتقان رەسمي حابارلامادا.
ارتىنان اتىس كەزىندە جاراقات العان قىرعىز شەكاراشىسى حۋسنيدين حوجيەۆتىڭ قايتىس بولعانى تۋرالى اقپارات تارادى.
تاجىكستاننىڭ شەكارا قىزمەتى وسى وقيعانىڭ مۇلدەم باسقاشا باستالعانىن مالىمدەدى. قىرعىزستان اسكەريلەر شەكارانى بۇزىپ قانا قويماي، اتىستى وزدەرى باستاعان.
«قىرعىزدىڭ ءتورت شەكاراشىسى مەملەكەتتىك شەكارانى زاڭسىز كەسىپ وتكەن. قارۋ اسىنعان ساربازدار دەۆاشتيچ اۋدانى تۇرعىندارىنىڭ توعىز جىلقىسىن ۇرلاپ، قىرعىزستان جاققا الىپ كەتپەكشى بولدى. تاجىك شەكاراشىلارى ولاردىڭ مەملەكەتتىك شەكارانى بۇزعانى جايىندا ەسكەرتۋ جاسادى. بىراق ولار وق اتتى. تاجىك شەكاراشىلارى دا قارۋ قولداندى. شەكارانى بۇزعان ەكى ادام جارالاندى»، - دەدى شەكارا قىزمەتىنىڭ ماماندارى Sputnik تاجىكستان تىلشىسىنە بەرگەن سۇحباتىندا.
قازىرگى كەزدە وقيعا ورنىنا ەكى ەلدىڭ شەكارا وكىلدەرى اتتاندى. ولار ماسەلەنىڭ ءمان-جايىن انىقتايدى.
"ادىرنا" ۇلتتىق پورتالى
