Qyrǵyz-tájik shekarasyndaǵy atysta bir adam kóz jumdy

2260
Adyrna.kz Telegram

Qyrǵyzstan men Tájikstan shekarada bolǵan taǵy bir qarýly qaqtyǵysty tekserýge kiristi. Osy oqıǵa kezinde  27 jastaǵy qyrǵyz shekarashysy oqqa ushty, dep habarlaıdy «Adyrna» ulttyq portaly Sputnik Qazaqstan saıtyna silteme jasap.

Resmı málimetke sáıkes, atys 8 shilde kúndi keshki saǵat bestiń kezinde Chashmagıldan asýyna jaqyn jerde bolǵan. Qyrǵyzstannyń shekara qyzmeti qarýly qaqtyǵysty tájik áskerıleri bastady dep otyr.

«Shamamen, saǵat 17:00-de Qyrǵyzstan Respýblıkasynyń atpen júretin shekarashylar jasaǵy Batken oblysy Leılek aýdanyndaǵy Naýmın asýynyń mańaıynda shekara boıymen qyzmet atqarǵan. Al Chashmagıldan asýynyń janynda Tájikstan shekarashylary kenetten shabýyl jasady. Jaraqat alǵan adamdar bar», - delingen Qyrǵystannyń shekara qyzmeti taratqan resmı habarlamada.

Artynan atys kezinde jaraqat alǵan qyrǵyz shekarashysy Hýsnıdın Hojıevtiń qaıtys bolǵany týraly aqparat tarady.

Tájikstannyń shekara qyzmeti osy oqıǵanyń múldem basqasha bastalǵanyn málimdedi. Qyrǵyzstan áskerıler shekarany buzyp qana qoımaı, atysty ózderi bastaǵan.

«Qyrǵyzdyń tórt shekarashysy memlekettik shekarany zańsyz kesip ótken. Qarý asynǵan sarbazdar Devashtıch aýdany turǵyndarynyń toǵyz jylqysyn urlap, Qyrǵyzstan jaqqa alyp ketpekshi boldy. Tájik shekarashylary olardyń memlekettik shekarany buzǵany jaıynda eskertý jasady. Biraq olar oq atty. Tájik shekarashylary da qarý qoldandy. Shekarany buzǵan eki adam jaralandy», - dedi shekara qyzmetiniń mamandary  Sputnik Tájikstan  tilshisine bergen suhbatynda.

Qazirgi kezde oqıǵa ornyna eki eldiń shekara ókilderi attandy. Olar máseleniń mán-jaıyn anyqtaıdy.

"Adyrna" ulttyq portaly

 

Pikirler