شىلدە ايىنىڭ اياعىندا اقتوبە قالاسىندا «Aktobe Mall» ساۋدا، ويىن-ساۋىق ورتالىعى اشىلادى دەپ حابارلايدى "ادىرنا" ۇلتتىق پورتالىنىڭ ءتىلشىسى.
«Aktobe Mall» ساۋدا، ويىن-ساۋىق ورتالىعى ەكى كەزەڭدە پايدالانۋعا بەرىلمەك. اتاپ ايتقاندا، وسى ايدىڭ اياعىندا جالپى اۋماعى 44 000 شارشى مەتر بولاتىن مۋلتفۋنكتسيونالدى ساۋدا، ويىن-ساۋىق ورتالىعى اشىلادى. ورتالىقتا برەند دۇكەندەر، اۋماعى 4 400 شارشى مەترلىك بالالار مەن جاسوسپىرىمدەرگە ارنالعان قازاقستانداعى ەڭ ۇلكەن جابىق ويىن-ساۋىق پاركى جۇمىس جاسايتىن بولادى.
ەكىنشى كەزەڭدە ساۋدا ورتالىعىنىڭ اۋماعى 70 مىڭ شارشى مەترگە دەيىن كەڭەيتىلمەك.
سونداي-اق اقتوبە قالاسىنداعى ساڭكىباي باتىر داڭعىلى بويىمەن، ەدىگە باتىر داڭعىلىنان «Aktobe Mall» ساۋدا، ويىن-ساۋىق ورتالىعىنا دەيىن امفيتەاتر، سۋبۇرقاق جانە ت.ب. زاماناۋي نىساندار سالىنادى. بۇل جوبانىڭ جالپى قۇنى — 5 ملرد تەڭگە. جوباعا «بيزنەستىڭ جول كارتاسى — 2025» باعدارلاماسى اياسىندا مەملەكەتتىك قولداۋ كورسەتىلگەن.
ايتا كەتۋ كەرەك، جوبانىڭ ءبىرىنشى كەزەڭىندە 600 ادام، نىسان تولىق پايدالانۋعا بەرىلگەن سوڭ ءبىر مىڭ ادام جۇمىسپەن قامتىلادى.
سونداي-اق وبلىس ورتالىعىنداعى باتىس-2 شاعىن اۋدانىندا «كوكتوبە» قوناقۇيى پايدالانۋعا بەرىلدى. جوبا قۇنى — 2 ملرد تەڭگە.
قوناقۇيدە كەلۋشىلەرگە قولايلى جاعداي جاسالعان. نىساندا ءماجىلىس زالى، مەيرامحانا، اسەمدىك سالونى، فيتنەس زال جانە ت.ب. بار. مۇندا 50 ادام جۇمىسپەن قامتىلعان.
"ادىرنا" ۇلتتىق پورتالى.