Facebook الەۋمەتتىك جەلىسىنە سالعان سوڭعى پوستىندا مارك تسۋكەربەرگ كوپتەگەن نەتيزەندەردىڭ نازارىن وزىنە اۋداردى. سەبەپ تە جوق ەمەس، باستى ماسەلە اتالعان الەۋمەتتىك جەلىلەردىڭ جاقىن ۋاقىتتا وزگەرىسكە ۇشىراۋى جانە جاڭا فۋنكتسيالاردىڭ ەنگىزىلۋى بولماق.
اۆتوردىڭ حابارلاۋىنشا Facebook جەلىسىن ايتارلىقتاي وزگەرىستەر كۇتىپ تۇرعان جوق، بىراق تا الەۋمەتتىك جەلى ىشىندە جاقىن ۋاقىتتا جارنامالار شوعىرى ايتارلىقتاي دەڭگەيدە كوبەيە تۇسپەك. بۇل جاعداي تاۋار بەرۋشىلەردىڭ وڭ جامباسىنا كەلمەك، جانە تۇتىنۋشىلار ءۇشىن تاڭداۋ ەركىندىگىن ۇلعايتا تۇسپەك،- دەيدى تسۋكەربەرگ. بىراق جارنامالىق كونتەنتتىڭ تىم كوبەيىپ كەتۋى جەلى تۇتىنۋشىلارىنىڭ كوڭىلىنەن شىعۋى ەكىتالاي ەكەندىگى دە بەلگىلى.
Instagram جەلىسىنە كەلەر بولساق، بۇل پلاتفورما ايتارلىقتاي قىزىقتى فۋنكتسيالارمەن تولىقتىرىلا تۇسپەك. العاشقىسى-Insta Visual Search قوسىمشاسى. بۇل قوسىمشا ارقىلى ءسىز بەن ءبىزدىڭ كەز كەلگەن تاۋاردى ىزدەپ، ساۋدا جاساۋىمىز ىڭعايلانا تۇسپەك. وزىڭىزگە ۇناعان تاۋاردى جەلىگە ەنگىزسەڭىز بولدى، پلاتفورما سىزگە ىزدەگەن زاتىڭىزدى ساتۋشى بىرنەشە دۇكەندەر ءتىزىمىن مازىرىڭىزگە شىعارىپ بەرەدى. بۇل فۋنكتسيانىڭ فەيسبۋكتاعى نۇسقاسى Facebook Marketplace دەپ اتالماق، جانە بۇل دۇكەندەر جارناما ارقىلى دا ءوز تاۋارلارىن تۇتىنۋشىلارعا ۇسىنا الادى.
WhatsApp تا ءوز الاڭىنا ونلاين-دۇكەندەردى كوپتەپ شوعىرلاندىرماق. بىراق مەسسەندجەر الدىڭعى ەكى پلاتفورما سەكىلدى دۇكەندەردى جارنامالاۋمەن اينالىسپايدى، تەك ساتۋشى مەن ساتىپ الۋشى اراسىنداعى بايلانىستى نىعايتۋ ماقساتىندا جاڭا فۋنكتسيالارمەن تولىقتىرىلماق.
بۇل جاڭالىقتار تسۋكەربەرگ ايتقانداي ءسىز بەن ءبىزدى ەلەڭ ەتكىزەر حابارلاردىڭ ءبىر بولىگى عانا. الداعى ۋاقىتتا الەۋمەتتىك جەلىلەرگە كوپتەگەن «قۇلاق ەستىپ، كوز كورمەگەن» جاڭا قوسىمشالار قوسىلا بەرمەك. اۆتورلار ايتۋىنشا بۇل قوسىمشالار تۇتىنۋشىلاردى جاڭا ترەندتەرگە داعدىلاندىرادى. ءوزىڭىز پىكىر ءبىلدىرىڭىز، اتالعان «جاڭاشىلدىقتار» ءسىزدىڭ كوڭىلىڭىزدەن شىعا ما؟
- قۋاندىق كورگەنوۆ
