جۇبايىن ولتىرگەنى ءۇشىن سوتتالعان ايەلگە راقىمشىلىق جاسالدى

2483
Adyrna.kz Telegram

قازاقستان پرەزيدەنتى قاسىم-جومارت توقاەۆ جۇبايىن ولتىرگەنى ءۇشىن سوتتالعان ەكىباستۇزدىق لاريسا انتونيۋككە راقىمشىلىق جاسادى، دەپ حابارلايدى «ادىرنا» ۇلتتىق پورتالى Polisia.kz سايتىنا سىلتەمە جاساپ.

پرەزيدەنت لاريسا انتونيۋكتىڭ راقىمشىلىق جاساۋ تۋرالى وتىنىشىنە قول قويدى، ەندى ايەل مەرزىمىنەن بۇرىن بوساتىلادى.

لاريسا انتونيۋك 2011 جىلى جۇبايىن ولتىرگەنى ءۇشىن سوتتالعان. ونى تۇركىمەنستان سوتى 21 جىلعا باس بوستاندىعىنان ايىرعان بولاتىن. تاعى 10 جىلى قالعان. بۇعان دەيىن بىرنەشە رەت جازاسىن جۇمسارتۋعا ءوتىنىش جازعان، بىراق بارىندە تەرىس جاۋاپ العان.

لاريسا ول جىگىتپەن قازاقستاندا تانىسقان، كەيىن ءبىراز ۋاقىتتان سوڭ قارىم-قاتىناسىن زاڭداستىرعان. ۇيلەنگەننەن كەيىن جاستار جىگىتتىڭ تۋعان جەرىنە - تۇرىكمەنستانعا كوشىپ بارادى. سوتتالۋشىنىڭ ايتۋىنشا، كۇيەۋىنىڭ اتا-اناسى ونى بىردەن قابىلداماعان. كەيىن ول جۇبايىنىڭ ەسىرتكىگە تاۋەلدى ەكەنىن بىلگەن. ەر ادام قارجىلىق قيىندىقتارعا تاپ بولىپ، وتباسى مۇشەلەرىنە قول كوتەرە باستاعان، ەسىرتكى الۋ ءۇشىن اقشا تالاپ ەتكەن.

لاريسا جۇمىستا جۇرگەندە بالالاردىڭ ءومىرى ءۇشىن ۇنەمى قورقىپ وتىراتىنىن ايتقان. الايدا ءبىر كۇنى جانجال كەزىندە ول ءوزىن قورعايمىن دەپ كۇيەۋىن ءولتىرىپ الادى. لاريسا جەرگىلىكتى كولونياعا قامالىپ، ءتورت بالاسى بالالار ۇيىنە جىبەرىلەدى.

كەيىن ول قازاقستانعا قايتارىلادى، وندا ول وسكەمەننەن 200 شاقىرىم جەردەگى ايەلدەر كولونياسىندا جازاسىن وتەيدى. لاريسانىڭ اپكەسى بالالاردى بالالار ۇيىنەن الىپ كەتىپ، قامقورلىعىنا الدى.

2020 جىلدىڭ مامىرىندا قىلمىستىق-اتقارۋ جۇيەسىنىڭ قىزمەتكەرلەرى وعان بالالارىمەن ۆيدەوقوڭىراۋ ارقىلى سويلەسۋگە مۇمكىندىك بەرەدى، ول سول كەزدە 10 جىلدا العاش رەت بالالارىن كوردى. سوتتالعان كەزدە بالاسى ەكى جاستا ەدى. وعان قامقورلىقتى ۇلكەن قىزى الدى، قازىر ول كۇيەۋىمەن كىشكەنتايلارعا قارايدى، ءبارى ءبىر شاڭىراق استىندا تۇرادى.

«مەكەمە قىزمەتكەرلەرى قاجەتتى ماتەريالداردى ۋاقىتىلى جيناپ، جىبەردى. قازاقستان پرەزيدەنتى لاريسا انتونيۋككە راقىمشىلىق جاسادى. سوتتالۋشىنىڭ مەرزىمى 21 جىلدان 16 جىلعا قىسقارتىلدى. ول ءتيىستى قۇجاتپەن تانىستى. راقىمشىلىققا بايلانىستى ونىڭ رەسمي مەرزىمى 2021 جىلدىڭ شىلدەسىنىڭ سوڭىندا اياقتالادى. لاريسا جازاسىن وتەۋ كەزىندە ءوزىن جاقسى جاعىنان كورسەتتى. تىگىن تسەحىندا جۇمىس ىستەيدى. بارلىق مادەني ءىس-شارالارعا بەلسەندى قاتىسادى»، - دەپ حابارلادى شقو بويىنشا قىلمىستىق-اتقارۋ جۇيەسى دەپارتامەنتىنىڭ باسشىسى جانبولات كالەتاەۆ.

"ادىرنا" ۇلتتىق پورتالى

پىكىرلەر