ەلوردا كوشەسىندە ۇستىندە كيىمى جوق ەر ادام كوشەدە ۆەلوسيپەد تەۋىپ جۇرگەن. بۇل تۋرالى نۇر-سۇلتان قالالىق پوليتسيا دەپارتامەنتى حابارلادى.
ۆەدومستۆو مالىمەتىنشە، تاڭعى ساعات 07.14-تە «102» ارناسىنا ەسىل وزەنىنىڭ جاعالاۋىندا تىر جالاڭاش ەر ادامنىڭ ۆەلوسيپەدپەن كەتىپ بارا جاتقانى تۋرالى حابارلاما تۇسكەن. دەرەۋ وقيعا ورنىنا جەتكەن پاترۋلدىك پوليتسيا قىزمەتكەرلەرى ىشىمدىككە ماس كۇيدەگى ازاماتتى ۇستادى.
ونىڭ ۇستىندە كيىمنەن تەك اياق كيىمى عانا بولعان.
«42 جاستاعى قۇقىق بۇزۋشىنىڭ ايتۋىنشا، ول تۇنگى ۋاقىتتا تانىسىمەن وزەن جاعالاۋىندا ىشىمدىك ىشكەن. كەيىن ەر ادام سالقىنداۋ ءۇشىن وزەنگە تۇسكەن. ال سۋدان شىققان كەزدە جاعالاۋدان كيىمىن تاپپاي قالعان. تانىسى كيىمدەرىن الىپ، بەلگىسىز باعىتقا كەتىپ قالعان. ەر ادام كەزدەسۋگە كەلگەن ءاۆتوموبيلىنىڭ باگاجىنان ۆەلوسيپەدىن الىپ، باراەۆ كوشەسى بويىنداعى ۇيىنە جەتپەك بولعان. ۇستالعان ازامات الكوگولگە ماس بولعاندىقتان كولىك رۋلىنە وتىرماعاندىعىن ايتىپ وتىر»، - دەدى دەپارتامەنتتەن.
قوعامدىق ورىندا ىشىمدىك ىشكەنى جانە قوعامدىق تارتىپكە كەرەعار ارەكەتكە بارعانى ءۇشىن ەر ادامنىنڭ ۇستىنەن قر اكىمشىلىك قۇقىق بۇزۋشىلىق تۋرالى كودەكستىڭ 440, 434-باپتارىمەن اكىمشىلىك ءىس قوزعالدى.
نۇر-سۇلتان قالالىق مامانداندىرىلعان اۋدانارالىق اكىمشىلىك سوتىنىڭ شەشىمىمەن ەر ادام اكىمشىلىك قاماۋعا الىندى جانە ايىپپۇل تولەيتىن بولادى.
