قازاقستاندىقتار Telegram-دا ۆاكتسينا قۇرامىندا ماگنيت بولشەكتەر بار ەكەنى تۋرالى تەوريانى تاعى دا تاراتىپ جاتىر. بۇل جولى «دالەل» رەتىندە دوكتور دجەين ءرۋبيدىڭ سۇحباتى الىنعان. ول ماگنيت بولشەكتەر ۆاكتسينا قۇرامىنداعى mRNA-نى ادام اعزاسىنداعى جاسۋشالارعا «يتەرۋ» ءۇشىن قاجەت دەپ مالىمدەگەن، دەپ حابارلايدى «ادىرنا» ۇلتتىق پورتالى Stopfake.kz سايتىنا سىلتەمە جاساپ.
پورتال مالىمەتىنشە، شىن مانىندە دجەين رۋبي دارىگەر ەمەس. ول ءوزىن دەنساۋلىق ساقتاۋ ەكونوميستى جانە پسيحولوگيا دوكتورى دارەجەسى بار ساياسي ساراپشى رەتىندە تانىستىرادى.
بۇعان دەيىن ول COVID-19 پاندەمياسىنا بايلانىستى جالعان اقپارات تاراتقانى ءۇشىن بايقالعان. بۇل جولى ول COVID-19-دىڭ الدىن الۋعا ارنالعان پرەپاراتتار وندىرىسىندە ماگنيت بولشەكتەر ادەيى قولداناتىنىن مالىمدەگەن. ول ۆاكتسينا العان ادامداردىڭ قولىنا ماگنيتتىڭ تارتىلۋ «قۇبىلىسىن» وسىلاي تۇسىندىرەدى، دەلىنگەن پورتالدا.
قازىرگى ۋاقىتتا عالىمدار دنق ۆاكتسينالارىن وندىرۋدە قولدانۋعا بولاتىن سۋپەرپاراماگنيتتى نونوبولشەكتەردى زەرتتەۋمەن اينالىسىپ جاتىر. الايدا دنق پلاتفورماسىندا جاسالعان بىردە-ءبىر ۆاكتسينا جوق. سونىمەن قاتار سۋپەرپاراماگنيتتى نانوبولشەكتەردى قولدانۋ تەك زەرتتەۋ ساتىسىندا جانە ءدارى-دارمەك وندىرۋدە قولدانىلمايدى.
پورتال اقپاراتىنا سۇيەنسەك، Pfizer/BioNTech جانە Moderna سياقتى مرنق ۆاكتسينالارىندا ءليپيدتى نانوبولشەكتەر جاسۋشالارعا مرنق-نى جەتكىزۋ ءۇشىن قولدانىلادى. ولار ماگنيتتىك قاسيەتكە يە ەمەس جانە اعزاعا زيان كەلتىرمەستەن قىسقا ۋاقىت ىشىندە ىدىرايدى. باسقا ۆاكتسينالاردا، سونىڭ ىشىندە قازاقستاندا قولدانىلاتىن ەكپەلەردە ماگنيت بولشەكتەر جوق.
"ادىرنا" ۇلتتىق پورتالى
