Qazaqstandyqtar Telegram-da vakına quramynda magnıt bólshekter bar ekeni týraly teorııany taǵy da taratyp jatyr. Bul joly «dálel» retinde doktor Djeın Rýbıdiń suhbaty alynǵan. Ol magnıt bólshekter vakına quramyndaǵy mRNA-ny adam aǵzasyndaǵy jasýshalarǵa «ıterý» úshin qajet dep málimdegen, dep habarlaıdy «Adyrna» ulttyq portaly Stopfake.kz saıtyna silteme jasap.
Portal málimetinshe, shyn máninde Djeın Rýbı dáriger emes. Ol ózin densaýlyq saqtaý ekonomısti jáne psıhologııa doktory dárejesi bar saıası sarapshy retinde tanystyrady.
Buǵan deıin ol COVID-19 pandemııasyna baılanysty jalǵan aqparat taratqany úshin baıqalǵan. Bul joly ol COVID-19-dyń aldyn alýǵa arnalǵan preparattar óndirisinde magnıt bólshekter ádeıi qoldanatynyn málimdegen. Ol vakına alǵan adamdardyń qolyna magnıttiń tartylý «qubylysyn» osylaı túsindiredi, delingen portalda.
Qazirgi ýaqytta ǵalymdar DNQ vakınalaryn óndirýde qoldanýǵa bolatyn sýperparamagnıtti nonobólshekterdi zertteýmen aınalysyp jatyr. Alaıda DNQ platformasynda jasalǵan birde-bir vakına joq. Sonymen qatar sýperparamagnıtti nanobólshekterdi qoldaný tek zertteý satysynda jáne dári-dármek óndirýde qoldanylmaıdy.
Portal aqparatyna súıensek, Pfizer/BioNTech jáne Moderna sııaqty mRNQ vakınalarynda lıpıdti nanobólshekter jasýshalarǵa mRNQ-ny jetkizý úshin qoldanylady. Olar magnıttik qasıetke ıe emes jáne aǵzaǵa zııan keltirmesten qysqa ýaqyt ishinde ydyraıdy. Basqa vakınalarda, sonyń ishinde Qazaqstanda qoldanylatyn ekpelerde magnıt bólshekter joq.
"Adyrna" ulttyq portaly
