ءبىر ءىستى ۋاقىتىلى تىندىرۋ ءۇشىن جوسپار كەرەك. بىراق، تەك جوسپارمەن ءجۇرۋ شارشاتاتىن ءارى ەركىندىكتەن ايىراتىن جۇمىس. ال تىم ەركىنسىپ كەتسەڭ، اتقارىلۋى ءتيىس شارۋا جايىنا قالادى.
ولاي بولسا، تومەنگە ەركىندىكتەن قاعىلماي، ءىسىن ۋاقىتىلى تىندىرعىسى كەلەتىندەرگە ارناپ، ءبىرسىپىرا كەڭەس ازىرلەپ قويدىق. ەگەر تايم-مەنەدجمەنتتەن شارشاعان بولساڭىز، ارتىق ەنەرگيا جۇمساماي، بارىنە ۇلگەرگىڭىز كەلسە، مىنا كەڭەستەرگە قۇلاق اسىڭىز.
كۇندەلىكتى ادەتتەر
كۇن سايىن قايتالاي بەرەتىن ريتۋالدار ءتىزىمىن قۇراستىرىپ قويىڭىز. كەستە ەتىپ ازىرلەپ، بولمەڭىزدىڭ كورىنەتىن جەرىنە ءىلىڭىز. ادەتتە ريتۋالدار كوپ ۋاقىتتى المايدى. 10 مينۋت جاتتىعۋ جاساۋ، 20 مينۋت كىتاپ وقۋ دەگەن سىندى ادەتتەر كۇندەلىكتى دامۋعا ءوز سەپتىگىن تيگىزەدى.ريتۋالدار دامۋعا جەتەلەيدى. جەتىستىككە تەك جانىڭدى سالىپ جاساعان ارەكەتتەرىڭ ەمەس، از-ازدان، ۇزدىكسىز جاسالعان جۇمىستار دا كوپتەپ سەپتىگىن تيگىزەتىنىن ۇمىتپايىق.
شۇعىل شارۋالار
كەيىنگە قالدىرۋعا بولمايتىن شارۋالار ءتىزىمىن جاساڭىز. ماسەلەن، انكەتا تولتىرۋ، پوچتاعا جىبەرۋ، سايتتىڭ ديزاينىنا وزگەرتۋلەر ەنگىزۋ سىندى شۇعىل شارۋالاردى جوسپارعا ءتۇرتىپ قويۋ قاجەت. دەسە دە، شۇعىل شارۋالار ماڭىزدى ەمەس، ماڭىزدى شارۋالار شۇعىل ەمەس ەكەنىن ەسكە سالامىز.
ورىنداۋ كۇنى بەلگىسىز شارۋالار
اپتا ىشىندە اتقارىلۋى ءتيىس، بىراق ناقتى ۋاقىتى بەلگىلەنبەگەن شارۋالار بولادى. ءبىر قىزىعى، مۇنداي شارۋالاردىڭ بەلگىلى ءبىر دەدلاينى جوق. سولاردى اي ىشىندە نەمەسە اپتا ىشىندەگى كۇندەردىڭ بىرىنە قويىڭىز. ماسەلەن، ءجۇزىپ ۇيرەنۋ جىل ىشىندەگى باستى ماقساتىڭىز دەلىك. ءجۇزىپ ۇيرەنۋ ءۇشىن الدىمەن ارنايى دارىسكە جازىلۋىڭىز كەرەك. دارىسكە جازىلماس بۇرىن، بىلىكتى جاتتىقتىرۋشىنى تاڭداي الۋىڭىز ماڭىزدى. بىراق قاي كۇنى ءجۇزۋ ساباعانىنا جازىلاتىنىڭىز، قاشاننان باستاپ ۇيرەنەتىنىڭىز بەلگىسىز بولۋى مۇمكىن. بۇل ماقساتىڭىزدى كەيىنگە قالدىرا بەرمەس ءۇشىن ارنايى ءبىر كۇندى بەلگىلەپ، ىسكە كىرىسىپ كەتۋ كەرەك.
بۇل ءتىزىم نەسىمەن پايدالى؟ ءبىز كەيدە گرافيكتى تولتىرۋ ءۇشىن كەرەكتى-كەرەكسىز شارۋالاردى توقتاۋسىز اتقارا بەرەمىز. ونىڭ پايداسى بار ما، جوق پا، ماڭىزدى ەمەس. قىسقاسى، پايداسىز دۇنيەگە ارتىق ەنەرگيا جۇمساۋ ارقىلى كۇش-جىگەردى سارقىپ الۋدان اباي بولىڭىز.
نازەركە اسەتوۆا
