2021 جىلى اقتوبە وبلىسىندا 465 شاقىرىم جول جوندەلەدى. بۇل تۋرالى وكق-دە وتكەن ءباسپاسوز ءماسليحاتىندا اقتوبە وبلىسىنىڭ اكىمى وڭداسىن ورازالين جەتكىزدى.
«وبلىستا جاقسى جانە قاناعاتتانارلىق جاعدايداعى جولداردىڭ ۇلەسى بۇگىنگى كۇنى 61% قۇرايدى. 5 جىل بۇرىن بۇل كورسەتكىش 48% بولدى. بيىل 465 شاقىرىم جولدى جوندەۋ جوسپارلانعان. ناتيجەسىندە جاقسى جانە قاناعاتتانارلىق جاعدايداعى جولداردىڭ ۇلەسى 66% -عا دەيىن ارتادى»، - دەدى و. ورازالين.
اتاپ ايتقاندا، 2021 جىلى قۇنى شامامەن 47 ملرد. تەڭگە بولاتىن اقتوبە - اتىراۋ - رف (استراحانعا باراتىن جول) شەكاراسى اراسىنداعى اۆتوكولىك جولىن پايدالانۋعا بەرۋ جوسپارلانىپ وتىر. سونىمەن بىرگە «اقتوبە-قاندىاعاش» ۋچاسكەسىن قالپىنا كەلتىرۋ جۇمىستارى باستالدى، جوبانىڭ جالپى قۇنى 62,5 ملرد. تەڭگە.
سونداي-اق، اعىمداعى جىلى اقتوبە - ورسك، اقتوبەنىڭ وڭتۇستىك اينالما جولى، قوبدا - مارتوك ۋچاسكەلەرىن قالپىنا كەلتىرۋ جانە كۇردەلى جوندەۋ سياقتى ءىرى جوبالاردى اياقتاۋ جوسپارلانۋدا.
قالالىق تاسىمالداۋ جۇمىستارىنا كەلەتىن بولساق، مۇندا ەلەكتروندى تولەم جۇيەسى مەن جولاقىنىڭ ديففەرەنتسيالانعان ءتۇرى ەنگىزىلىپ، 250 قالالىق مارشرۋتتىق اۆتوبۋستاردا ۆاليداتورلار ورناتىلعان.
وبلىستىق اۆتوبۋس باعىتىنداعى 10 تاسىمالداۋشىنىڭ شىعىنىن سۋبسيديالاۋعا 96 ملن تەڭگەدەن استام قاراجات ءبولىندى.
تەمىرجول تاسىمالى سالاسىندا بيىل الەۋمەتتىك ماڭىزى بار «اقتوبە-شالقار» اۋدانارالىق بايلانىسىن سۋبسيديالاۋعا 324 ميلليون تەڭگە ءبولىندى.
