سوت القاسى ساتباەۆ قالاسىندا بەس جاسار قىز بالانى زورلاۋ وقيعاسى بويىنشا ايىپتالعان ەرلى-زايىپتىنىڭ ءبىرىن ءومىر بويىنا، ەندى ءبىرىن 22 جىلعا تۇرمەگە قاماۋعا ۇكىم ەتتى، دەپ جازادى ازاتتىق.
بۇل وقيعا 2020 جىلى شىلدەدە ساتباەۆتاعى جاپپاي تارتىپسىزدىككە تۇرتكى بولعان ەدى.
سوت القاسى ۇكىمدى 21 شىلدەدە شىعاردى. جابىق وتكەن وتىرىستا سوت القاسى ەرلى-زايىپتىنى "ادام زورلادى", كىشكەنتاي قىزعا "جىنىستىق سيپاتتاعى زورلىق جاسادى" جانە "دەنساۋلىعىنا اۋىر زاقىم كەلتىردى" دەپ تاپتى. سوتتالعانداردىڭ اتى-ءجونى ايتىلمادى.
ەر ادام ءومىر بويىنا، ايەلى 22 جىلعا سوتتالدى. ەكەۋى دە ءومىر بويى بالالارعا ساباق وقىتا المايدى. سوتتىڭ مالىمەتىنشە، زاڭ بويىنشا ايەل ادامدارعا ءومىر بويىنا تۇرمە جازاسى بەرىلمەيدى.
"سوت القاسى داۋىس بەرۋ ارقىلى ايىپتالۋشىلاردى بارلىق باپ بويىنشا ايىپتى دەپ تاپتى. [ەر ادامنىڭ] قىلمىستى ماس بولىپ جاساعانى جازانى اۋىرلاتاتىن جاعداي رەتىندە ەسەپكە الىندى" دەدى سوتتىڭ ءباسپاسوز قىزمەتى.
ازاتتىق ءتىلشىسى ايىپتالۋشىلاردىڭ ادۆوكاتىمەن بايلانىسپاق بولىپ ەدى، ول تەلەفونعا جاۋاپ بەرمەدى. ەكى ايىپتالۋشىنىڭ بۇرىنعى ادۆوكاتى (پروتسەسس كەزىندە ىستەن شەتتەتىلگەن) ولاردىڭ كىناسىز ەكەنىن ايتقان. ەل پرەزيدەنتى قاسىم-جومارت توقاەۆقا دا حات جازعان.
ايىپتاۋ اكتىسىنە ساي، 2020 جىلى 23 شىلدەدە ەر ادام (تەرگەۋ كەزىندە وزىنە قول سالىپ قايتىس بولعان – رەد.) ماس كۇيىندە پودەزد الدىندا كىشكەنتاي قىزدى ۇستاپ، پاتەرىنە الىپ بارعان. كەيىن كورشىسىن شاقىرىپ، قىز بالانى زورلاۋدى ۇسىنعان. كورشىسى بۇل ۇسىنىسقا كەلىسكەن. ەكەۋى ايەلدى شاقىرىپ، ول بالاعا "بەلگىسىز ءبىر ءدارىنى ەككەن". وسىدان سوڭ قىز بالا ەسىنەن تانىپ قالعان، ال ەكى ەركەك قىزدى زورلاعان.
ساراپتاما قورىتىندىسىنا ساي، بۇل وقيعا قىز بالانىڭ پسيحيكاسىنا قاتتى اسەر ەتكەن.
وسى ءىس بويىنشا نەگىزگى ايىپتالۋشى – 62 جاستاعى ەر ادام سوتقا جەتپەي كوز جۇمعان. ول تەرگەۋ يزولياتورىندا ءولى كۇيى تابىلعان ەدى. پوليتسيا ونىڭ سۋيتسيد جاساعانىن حابارلاعان. باسىندا ءىىم تەك ءبىر ادامنىڭ ۇستالعانىن ايتقان. كەيىن ەرلى-زايىپتىنىڭ دا قاماۋعا الىنعانى ءمالىم بولدى.
جوعالعان كىشكەنتاي قىز 62 جاستاعى ەر ادامنىڭ پاتەرىنەن تابىلعان سوڭ ساتباەۆتا جۇزدەگەن ادام وسى ءۇيدىڭ ماڭىنا جينالىپ، ەركەكتى جاۋاپقا تارتپاق بولعان. بىرنەشە ادام كۇدىكتى مەن كورشىلەرىنىڭ پاتەرىن قيراتقان. كەيىن جينالعاندار كۇدىكتىنى پوليتسەيلەر جاسىرىن تۇردە بولىمشەگە الىپ كەتتى دەگەندى ەستىپ، پوليتسياعا بارعان. سول جەردە پوليتسيا عيماراتىن قيراتىپ، 16 كولىكتى ورتەگەن. رەسمي دەرەك بويىنشا، 14 تۇرعىن مەن 50 پوليتسەي زارداپ شەككەن.
وسى تارتىپسىزدىك بويىنشا قىلمىستىق ءىس قوزعالىپ، توعىز ادام ءۇش جىلعا تۇرمەگە قامالدى. 44 ادام ءتورت جىل، ەكى ادام ءبىر جارىم جىل شارتتى جازا الدى. ءتورت ادام "جاپپاي تارتىپسىزدىك ۇيىمداستىردى", ەكى ادام "تارتىپسىزدىككە شاقىردى", 51 ادام "تارتىپسىزدىككە ارالاستى" دەپ ايىپتالعان. 42 ايىپتالۋشىعا "بيلىك وكىلىنە كۇش قولداندى" دەگەن دە ايىپ تاعىلعان. ايىپتالۋشىلاردىڭ بارلىعى پروكۋرورمەن پروتسەسسۋالدى كەلىسىم جاساسقان. وسى ءىس بويىنشا ەكى ادامعا ىزدەۋ جاريالانعان.
