اتىراۋدا ءبىر كۇندە ەكى ادام سۋعا كەتتى، دەپ حابارلايدى “ادىرنا” ۇلتتىق پورتالى قازاقپاراتۇا سىلتەمە جاساپ.
وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىنەن ءمالىم ەتكەندەي، كەشە، 20 ماۋسىمدا قۇرمانعازى جانە جىلىوي اۋداندارىندا ەكى ادام بەلگىلەنبەگەن ورىندا شومىلىپ، سۋعا باتىپ كەتكەن.
«قۇرمانعازى اۋدانىنداعى 21 جاستاعى جىگىت ساعات 9:00 شاماسىندا جەكە كولىگىن جوندەتۋ ءۇشىن شورتانباي اۋىلىنداعى جۇمىستاسىنىڭ ۇيىنە بارعان. كەيىن ساعات 16:30 شاماسىندا كولىك جوندەيتىن جۇمىستاسىمەن بىرگە سۋعا ءتۇسۋ ءۇشىن قيعاش وزەنىنىڭ جاعالاۋىنا كەلگەن. كولىك يەسى وزەن جاعالاۋىنداعى تەمىر پيرستان سۋعا سەكىرگەن. شامالى ۋاقىتتان سوڭ سۋدان شىقپاعان جۇرگىزۋشىگە الاڭداعان دوسى دەرەۋ جەرگىلىكتى پوليتسيا ينسپەكتورى مەن اۋىل تۇرعىندارىنا حابارلاپ، سۋعا باتقان جىگىتتى ىزدەستىرۋ جۇمىسىن باستاعان»، - دەدى دەپارتامەنتتىڭ ءباسپاسوز قىزمەتىنەن.
وقىس وقيعا تۋرالى حابار قۇرمانعازى اۋدانىنداعى №7 ءورت ءسوندىرۋ بولىمىنە ساعات 17:15-تە تۇسكەن. اۋداننىڭ جەدەل-قۇتقارۋ جاساعىنان 6 قىزمەتكەر، 1 تەحنيكا مەن 1 ءجۇزۋ قايىعى جۇمىلدىرىلىپ، كەشكى ساعات 19:00-دە سۋعا باتقان جىگىتتىڭ دەنەسى وزەننەن شىعارىلعان.
سول كۇنى جىلىوي اۋدانىندا دا 1983 جىلى تۋعان ەر ادام سۋعا باتىپ كەتكەن.
«تۇرعىزبا اۋىلىندا ەكى جىگىت قوي كەزەگىنە شىققان. كۇننىڭ ىستىعىنان سالقىنداۋ ءۇشىن 38 جاستاعى جىگىت جەم وزەنىنە سۋعا تۇسكەن. ول سۋعا سەكىرگەن بويدا باتىپ بارا جاتقانى تۋرالى ايعايلاپ، كومەك سۇراعان. الايدا، جاعادا قالعان ازاماتتىڭ كومەكتەسپەك بولعان ارەكەتىنەن ناتيجە شىقپاعان» دەپ ءمالىم ەتتى ءباسپاسوز قىزمەتىنەن.
بۇل تۋرالى 112 نومىرەن ساعات 17:20-دا حابارلانعان. جىلىوي اۋداندىق جەدەل-قۇتقارۋ جاساعىنىڭ 4 قىزمەتكەرى ساعات 18:03-تە سۋعا كەتكەن جىگىتتىڭ دەنەسىن جاعاعا شىعارعان.
ەسكە سالا كەتەلىك، بۇعان دەيىن اتىراۋدا سۋعا باتقان ەكى ءجاسوسپىرىم قۇتقارىلعان بولاتىن.
