قىتايدا Broad Group كومپانياسى Living Building قۇراما كونسترۋكتسيالار جۇيەسىن قولدانا وتىرىپ، 29 ساعاتتا 10 قاباتتى عيمارات سالعان دەپ حابارلايدى "ادىرنا" ۇلتتىق پورتالى National Geograpic روسسيا باسىلىمىنا سىلتەمە جاساپ.
بۇل جۇيەنىڭ ەرەكشەلىكتەرىنىڭ ءبىرى ءار قۇرىلىس ءمودۋلى بۇكتەلگەن كەزدە كولىك كونتەينەرىمەن بىردەي كولەمگە يە بولادى.
ءار مودۋل زاۋىتتا جاسالادى، نەگىزىنەن سىم، اينەك جانە جەلدەتۋ جۇيەلەرىن قامتيتىن توت باسپايتىن بولاتتان جاسالعان. قۇرىلىس الاڭىنا كونتەينەر ولشەمىندەگى مودۋلدەردى الىپ، ولاردى قاجەت بولعان جاعدايدا بولتتارمەن بەكىتۋ ارقىلى بۇكتەۋگە بولادى. سودان كەيىن ولار ەلەكتر مەن سۋعا قوسىلادى، پايدالانۋعا دايىن بولادى.
Broad Group جاريالاعان ۆيدەودا عيماراتتىڭ قۇراستىرۋ پروتسەسى قانداي بولاتىندىعى كورسەتىلگەن. ول قىتايدىڭ وڭتۇستىگىندەگى چانشا قالاسىندا 28 ساعات 45 مينۋتتا سالىنعان.
Broad Group ءوزىنىڭ قۇراما كونسترۋكتسيالارى وتە بەرىك، سەيسميكالىق ءتوزىمدى جانە قاجەت بولعان جاعدايدا بولشەكتەۋگە جانە جىلجىتۋعا بەيىم ەكەنىن ايتادى.
كومپانيا بۇل جۇيەنى 200 قاباتتى بيىك عيماراتتاردى سالۋعا پايدالانۋعا بولادى دەيدى.
ايتا كەتەيىك، الەمدەگى ەڭ بيىك عيمارات — بۋردج حاليفا بارلىعى 163 قاباتتان تۇرادى. Trەەنugger سايتىنىڭ حابارلاۋىنشا، ۆيدەودا كورسەتىلگەن عيماراتتىڭ قۇنى مودۋلدەردى تاسىمالداۋ شىعىندارىن ەسەپتەمەگەندە ءۇش ميلليون دوللاردى قۇرايدى.
"ادىرنا" ۇلتتىق پورتالى.
