ءوز تاريحىنىڭ 86-شى جىلىنا قادام باسقان قۋىرشاق تەاترلارىنىڭ قارا شاڭىراعى، الماتى قالاسىنىڭ مادەني-تاريحي قۇندىلىقتارىنىڭ ءبىرى مەملەكەتتىك قۋىرشاق تەاترىنىڭ شىعارماشىلىعى قارقىندى دامۋدا. تەاتر ەلىمىزدەگى دەمالىسسىز جۇمىس جاسايتىن امبەباپ ۇجىمعا اينالعان. جاز مەزگىلىندە دە قالا تۇرعىندارى مەن قوناقتارى نازارىنا ءتۇرلى تانىمدىق قويىلىمدار مەن قىزىقتى ءىس-شارالار وتكىزۋدى جوسپارلاپ وتىرعان تەاتر ۇجىمى رەپەرتۋارلارىن ءتۇرلى رەجيسسەرلىك ينتەرپرەتاتسيالارعا تولى سپەكتاكلدەرمەن تولىقتىرۋدا. جىلدى ەكى جاڭا سپەكتاكلدىڭ تۇساۋكەسەرىمەن باستاعان قۋىرشاقتىقتار 27 ناۋرىز – دۇنيەجۇزىلىك تەاتر كۇنى مەرەكەسى قارساڭىندا ش.ايتماتوۆ پوۆەسى جەلىسىمەن ساحنالانعان رەجيسسەر د.جۇماباەۆانىڭ «انا – جەر انا» قويىلىمىمەن «ەرگۇۇ» قىرعىز تەاتر سىيلىعىن«قىرعىز اۆتورىنىڭ شىعارماسىن ەڭ ۇزدىك ساحنالاعان شەت ەلدىك تەاتر» نوميناتسياسىن جەڭىپ الدى. قىرعىز رەسپۋبليكاسىنىڭ «ەرگۇۇ» ۇلتتىق پرەمياسىنىڭ نەگىزى 2014 جىلى تەاتر قايراتكەرلەرى وداعىنىڭ باستاۋىمەن جانە «ايتىش» فوندىنىڭ قولداۋىمەن قالانعان. بۇل پرەميا ورتا ازيا وڭىرىندەگى بەدەلدى تەاتر سىيلىقتارىنىڭ ءبىرى بولىپ سانالادى. تەاترعا شىعارماشىلىق شابىت سىيلاعان جۇلدەدەن سوڭ، تاتارستان رەسپۋبليكاسى، قازان قالاسىندا ۇيىمداستىرىلعان «ناۋرۋز» تۇركى حالىقتارىنىڭ فەستيۆالىندە ونەر ورداسى «مەن ءبىر جۇمباق اداممىن... اباي» (رەج.: ا.زايتسەۆ) سپەكتاكلىمەن باق سىناۋدا. ۇلتتىڭ ۇلى ويشىلى، اعارتۋشى-ۇستاز اباي قۇنانبايۇلىنىڭ قارا سوزدەرىنە نەگىزدەلگەن قويىلىم قازاق مادەنيەتى مەن ادەبيەتىنىڭ الەم تەاترلارى ساحناسىنا جول تارتۋى ءۇشىن تالماي ەڭبەكتەنۋدە.
الەمدىك احۋالعا بايلانىستى اتالعان ونەر بايگەلەرى ونلاين تۇردە وتسە، تەاتر ۇجىمى رف، سانكت-پەتەربۋرگ قالاسىنداعى «كۋكART» حالىقارالىق قۋىرشاق تەاترلارى فەستيۆالىندە وفلاين ونەر كورسەتۋگە جول تارتادى. فەستيۆال شىمىلدىعى 22 ماۋسىم كۇنى تۇرىلسە، الماتى مادەنيەت باسقارماسىنا قاراستى مەملەكەتتىك قۋىرشاق تەاترى «رومەو مەن دجۋلەتتا» (رەج.: د.جۇماباەۆا) سپەكتاكلىمەن 27 ماۋسىم كۇنى، ساعات 17:00-دە زازەركالە تەاترىنىڭ ساحناسىندا ونەر كورسەتەدى.
كورەرمەندەر ساراپشىلار نازارىنا ءتۇرلى باعىتتاعى قويىلىمدار ۇسىناتىن ونەر دوداسى 1993 جىلدان بەرى وتكىزىلىپ كەلە جاتقان قايىرىمدىلىق باعىتتاعى كوممەرتسيالىق ەمەس جالعىز فەستيۆال. ءتۇرلى ەلدەر مەن حالىقتار اراسىنداعى مادەني كوپىرگە اينالعان بيىلعى فەستيۆالدە قىتاي، گەرمانيا، سەربيا ەستونيا، تىۆا، قازاقستان مەملەكەتتەرىنىڭ جانە سانكت-پەتەربۋرگ، ماسكەۋ قالالارىنىڭ ونەر وشاقتارى ءوز قويىلىمدارىن ۇسىنادى. فەستيۆال اياسىندا كورسەتىلەتىن تەاترلىق جوبالار، ارنايى كورسەتىلىمدەر مەن نەگىزگى باعدارلاماعا ەنگىزىلگەن سپەكتاكلدەر ساحنالادى. الەم كلاسسيكاسىنىڭ وزىق ۇلگىسى «رومەو مەن دجۋلەتتا» (رەج.: د.جۇماباەۆا) سپەكتاكلى نەگىزگى باعدارلاماعا ەنىپ وتىر.
«رومەو مەن دجۋلەتتا» تەاتر رەپەرتۋارىنا 2019 جىلدىڭ 24 قاڭتارىندا قوسىلعان ەرەسەكتەرگە ارنالعان سپەكتاكلدەرىڭ ءبىرى. جاس ەرەكشەلىگى 18 جاستان جوعارى كورەرمەندەرگە ارنالعان سپەكتاكل سۇلۋلىق پەن تازالىققا تابىنۋدان، البىرتتىعى جاراسقان ەكى عاشىقتىڭ تاعدىرى ارقىلى اۋلەت پەن توبىردىڭ بىتپەس داۋىن ارقاۋ ەتۋدەن تۋىنداعان. جارىققا شىققالى بىرنەشە حالىقارالىق تەاتر فەستيۆالىندە باق سىناعان سپەكتاكل قۋىرشاق تەاترىنىڭ جاڭا باعىتتاعى باتىل تاجىربيەلىن كورسەتىپ كەلەدى.
ايتا كەتەيىك، قۋىرشاق تەاترى وسىعان دەيىن 2019 جىلى وتكەن اتالمىش تەاتر فەستيۆالىنە ە.يونوۆتىڭ «انا جۇرەگى» قويىلىمىمەن قاتىسىپ «ۇزدىك اكتەرلىك انسامبل» نوميناتسياناسىن يەلەنگەن بولاتىن. قازاق قۋىرشاق تەاترىنىڭ شەكسىز مۇمكىندىگى مەن كوركەم ونەردىڭ الەمدىك وركەنيەتپەن ۇشتاسۋىنا تەر توگىپ كەلە جاتقان مادەنيەت مەكەنىنىڭ تۇلپارى ونەر بايگەسىندە وزا شاپسىن دەپ تىلەيمىز!
بەيبىت الكەەۆا
