بالالاردىڭ جاردەماقىسىن كوتەرىپ، ارقايسىنا 42 500 تەڭگەدەن تولەۋگە مۇمكىندىك جوق. ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ سوڭعى ۋاقىتتا قوعامدا قىزۋ تالقىلانعان سۇراققا جاۋاپ بەردى. ونىڭ سوزىنشە، مينيسترلىكتە بولىنگەن قارجى ءاربىر تيىنىنا دەيىن ەسەپتەلگەن ەكەن. سوندىقتان جاردەماقىلاردىڭ بارلىعىن ءبىر تولەمگە بىرىكتىرەتىن بولسا، باسقا ساناتقا كىرەتىن ادامدارعا زەينەتاقى تولەۋگە قارجى جەتپەي قالۋى مۇمكىن. وسى ورايدا، مينيستر بۇل ماسەلەلەردى قامتۋ ماقساتىندا الەۋمەتتىك كودەكس دايىندالىپ جاتقانىن جەتكىزدلى. ماماندار، الەمدىك تاجىريبەنى جان-جاقتى زەردەلەپ، جاڭا قۇجاتتىڭ اياسىندا الەۋمەتتىك قولداۋدىڭ ءتيىمدى شارالارىن قاراستىرماق، دەپ حابارلايدى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ.
«بىراق ءبىز ەكىنشى جاعىن دا ەسكەرۋىمىز كەرەك. قازىردىڭ وزىندە 18 جاسقا دەيىنگى 6 ميلليوننان استام بالالار بار. اربىرەۋىنە 42 500-دەن ەسەپتەسەك، قوماقتى قاراجات شىعادى. مەن ايتا كەتەر ەدىم، ءبىزدىڭ مينيسترلىكتە قازىرگى بيۋدجەتى 4 تريلليونعا جاقىن. رەسپۋبليكالىق بيۋدجەت، شامامەن، 14 تريلليون تەڭگە بولادى. سوندا قازىردىڭ وزىندە ءبىز بيۋدجەتتىڭ ۇشتەن ءبىر بولىگىن الىپ وتىرمىز. سونىڭ 96% جاردەماقى مەن زەينەتاقى سياقتى كىسىلەرگە تاراتىلىپ بەرىلەدى»، - دەيدى قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ.
سونداي-اق ۆەدومستۆو باسشىسى ءدال قازىر زەينەت جاسىن تومەندەتۋ ماسەلەسى قاراستىرىلماعانىن مالىمدەدى. ويتكەنى بەلگىلەنگەن مەجە تومەندەتىلەتىن بولسا، ازاماتتاردىڭ كوپ بولىگى قارتتىققا دەيىن قاجەتتى سومانى جيناپ ۇلگەرمەۋى مۇمكىن ەكەن. بىراق سەرىك شاپكەنوۆ زەينەتاقى قارجىسى اننۋيتەتتى بولعاندىقتان، قورعا سالىنعان بەلگىلى سومانى مەرزىمىنەن بۇرىن الۋعا بولادى دەيدى. ماسەلەن بيىلدان باستاپ 55 جاسقا دەيىنگى ەر ادامدار جيناقتاۋشى قورىندا 11,3 ملن تەڭگەدەن استام قارجى جيناپ ۇلگەرسە، ۇستىندەگى سومانى الۋعا قۇقىلى ەكەن.
"ادىرنا" ۇلتتىق پورتالى
