حالىق ساناعىنا دەپ الىنعان پلانشەتتەر كەيىن قايدا جۇمسالاتىنى بەلگىلى بولدى

1657
Adyrna.kz Telegram

بيىلعى حالىق ساناعىن وتكىزۋگە 27 مىڭ پلانشەت الىندى. ساناق بىتكەن سوڭ پلانشەتتەر ءبىرىنشى كەزەكتە ءبىلىم باسقارمالارىنا بەرىلەدى.

بۇل تۋرالى ۇلتتىق حالىق ساناعى 2021-ءدىڭ رەسمي وكىلى ولجاس سايلاۋبەكۇلى ايتتى.

ۇلتتىق حالىق ساناعىنىڭ رەسمي وكىلى بيىل ەلەكتروندى فورماتتا وتكەلى وتىرعان ساناقتىڭ ءمان-جايىن بايانداپ بەردى.

حالىق ساناعىن جۇرگىزۋ بويىنشا 27 مىڭنان استام پلانشەت الىنعان. ساناق جۇرگەن كەزدە ول ارنايى VPN كوزىنە قوسىلادى، ياعني ءبىز ادەتتە قوسىلىپ جۇرگەن ينتەرنەتكە قوسىلمايدى. تۇرعىندارمەن ساۋال جۇرگىزىلىپ بىتكەن ساتتە كونتەينەر بىردەن جابىلىپ، مالىمەت ۇلتتىق ستاتيستيكا سەرۆەرىنىڭ ورتالىعىنا كەلىپ تۇسەدى. ول جابىلعان سوڭ، ەشكىم ونى وزگەرتە المايدى، تىپتەن ساۋالناما جۇرگىزگەن ادام دا. ال ينتەرنەتى جوق، مۇلدەم بايلانىسى جوق ەلدى مەكەندەردە مالىمەتتەر پلانشەتتە جيناقتالادى، كونتەينەر جابىلعان سوڭ ونى اشا المايسىڭ. ينتەرۆيۋەر كەيىن اكىمدىكتەگى مەملەكەتتىك قىزمەتشىلەردىڭ ارنايى تورابى ارقىلى جىبەرەدى، - دەيدى ول.

ونىڭ ايتۋىنشا، حالىق ساناعى بىتكەن سوڭ، پلانشەتتەر ءبىرىنشى كەزەكتە ءبىلىم بولىمدەرىنە بەرىلمەك.

ساناق بىتكەننەن كەيىن پلانشەتتەردىڭ ءبىر بولىگى ستاتيستيكا كوميتەتىنىڭ اۋداندىق دەپارتامەنتتەرىنىڭ قاجەتتىلىگىنە بەرىلەدى. سونداي-اق جەرگىلىكتى اتقارۋشى ورگانداردىڭ قاجەتىنە جانە ءبىلىم باسقارمالارى مەن بولىمدەرىنە، مەكتەپتەرگە، دەنساۋلىق ساقتاۋ باسقارمالارى مەن اۋرۋحانالارعا تاپسىرىلادى، - دەدى ول.

قازىر حالىق ساناعى بويىنشا دايىندىق كەزەڭى ءجۇرىپ جاتىر. 1 ماۋسىمنان باستاپ بارلىعى 5 405 ينتەرۆيۋەر جانە 773 نۇسقاۋشى-باقىلاۋشى قاجەتتى مالىمەتتەردى جيناۋدا.

ينتەرۆيۋەرلەر قازىر تۇرعىنداردىڭ مەكەنجايلارىن ناقتىلاپ، وندا نەشە ادام تۇراتىنىن انىقتاۋدا. بۇل ساناق جۇرگىزۋدى اۋداندارعا ءبولۋ ءۇشىن كەرەك. ەرتەڭ ناعىز ساناق باستالعاندا، جۇكتەمەنى ينتەرۆيۋەرلەرگە تەڭدەي ەتىپ بولۋ ءۇشىن قاجەت. ول كەزدە ادامداردان جەكە مالىمەتتەر سۇرالمايدى، تەك ۇيدە قانشا ادام تۇراتىنى ناقتىلانادى، - دەيدى ولجاس سايلاۋبەكۇلى.

ال 1 قىركۇيەكتە نەگىزگى حالىق ساناعى باستالعاندا، تۇرعىندارعا 87 سۇراق قويىلادى ەكەن.

نەگىزگى ساناق كەزىندە تۇرعىندارعا كەڭەيتىلگەن سۇراقتار قويىلادى. ءۇيدىڭ جاعدايى، دەموگرافيا، الەۋمەتتىك سالا بويىنشا، شەتەلدە جۇرگەن ادامدارعا باعىتتالعان سۇراقتار بار. كوبىندە ءۇي گاز، سۋمەن قامتىلعان با دەگەن سياقتى ساۋالدار قويىلادى. ونداعى سۇراقتارمەن sanaq.gov.kz سايتىندا ساناق پاراعى دەگەن بەتتەن تانىسۋعا بولادى. ساناق كەزىندە قويىلاتىن سۇراقتاردىڭ باسىم كوپشىلىگى بۇرىننان بار سۇراقتار. دەگەنمەن وسى جولى ازاماتتاردىڭ مۇگەدەكتىگىنە قاتىستى سۇراقتار قوسىلدى، - دەدى ول.

سونداي-اق بيىلعى حالىق ساناعى ونلاين فورماتتا دا وتەدى. ول ءۇشىن sanaq.gov.kz پورتالىنا كىرىپ، ساۋالدارعا جاۋاپ بەرۋىڭىز كەرەك.

1 قىركۇيەكتەن 15 قازان ارالىعىندا sanaq.gov.kz پورتالىندا ونلاين ساناقتان وتۋگە بولادى. ادامدار ۇيىندە وتىرىپ، اسىقپاي ساۋالدارعا جاۋاپ بەرە الادى. بۇل تۇرعىندار ءۇشىن وتە ىڭعايلى. ول جەردە تىركەلىپ، ساۋالداردىڭ بارلىعىنا جاۋاپ بەرگەن سوڭ تەلەفونىڭىزعا نەمەسە ەلەكتروندىق پوشتاڭىزعا ساناقتان وتكەنىڭىز تۋرالى حابارلاما كەلەدى. ول حابارلامانى وشىرۋگە بولمايدى، ەرتەڭ ينتەرۆيۋەر كەلگەندە كورسەتەسىز. ول ءسىزدىڭ ساناقتان وتكەنىڭىزدى بىلدىرەدى، - دەيدى سايلاۋبەكۇلى.

 

پىكىرلەر