جاقىندا Quacquarelli Symonds (QS) حالىقارالىق رەيتينگ اگەنتتىگى 2022 جىلعى ۇزدىك ۋنيۆەرسيتەتتەردىڭ ءتىزىمىن جاريالادى. اكادەميالىق رەيتينگكە قازاقستاندىق 14 وقۋ ورنى ەندى. شىنىمەن قازاقستاندىق ۋنيۆەرسيتەتتەر الەمدىك الما-ماتەرلەردىڭ دەڭگەيىندە مە؟ الدە QS وقۋ ورىندارىنان جالعان ستاتيستيكا الىپ، الدانىپ ءجۇر مە؟ وسى ورايدا، ءبىلىم بەرۋ سالاسىنىڭ ساراپشىلارى Media CLUB QAZAQSTAN پلاتفورماسىندا اتالعان رەيتينگتىڭ قانشالىقتى دۇرىس وتكىزىلەتىنىن تالقىلادى.
رەيتينگتەگى جوعارى وقۋ ورىندارىنىڭ پوزيتسياسىن انىقتاۋ كەزىندە اكادەميالىق توپتار مەن جۇمىس بەرۋشى ۇيىم وكىلدەرىنەن جينالعان ساۋالنامالاردىڭ ناتيجەلەرى، سونداي-اق 2015 جىلدان باستاپ 2019 جىلعا دەيىنگى كەزەڭدەگى 14,7 ميلليون جاريالانىم ەسكەرىلگەن. بىراق اكادەميالىق ادالدىق ليگاسى حاتشىلىعىنىڭ باسشىسى ياكوۆ ۆورونكوۆتىڭ ايتۋىنشا، بۇل رەيتينگكە قاتىستى كوپتەگەن داۋلى ماسەلەلەر بار.
«QS رەيتينگىندەگى 40% قۇرىلىم ۋنيۆەرسيتەتتىڭ اكادەميالىق بەدەلىنەن تۇرادى. اكادەميالىق بەدەلىن انىقتاۋ ءۇشىن ساراپشىلار اراسىندا ساۋالناما جۇرگىزىلەدى. سايكەسىنشە وقۋ ورىندارى سول ساراپشىلارمەن ناقتى جۇمىس ىستەپ، ءوزىن ماداقتاۋدى، جاقسى پىكىر جازۋدى سۇرايدى. ال 20% قۇرىلىمى - مۇعالىمدەردىڭ دايەكسوزى. جاقىندا عانا ماسكەۋدەگى وقۋ ورنىنىڭ ءبىرى ماقتاپ ماقالالار جازۋمەن اينالىساتىن زەرتتەۋشى مۇعالىمدى «ساتىپ» العانى بەلگىلى بولدى. QS رەيتينگىندە جۇمىس بەرۋشىلەردەن دە ساۋالناما الادى. دەگەنمەن، بۇل رەيتينگتىڭ ادىلدىگىنە قاتىستى سۇراقتار كوپ», - دەدى ياكوۆ ۆورونكوۆ.
ەستەرىڭىزدە بولسا، «اتامەكەن» ۇقپ وتكەن جىلى ءوز ءتىزىمىن جاريالاعان بولاتىن. ولار تۇلەكتەردىڭ جۇمىسقا ورنالاسۋى مەن جالاقىلارىنىڭ كولەمىنە نەگىزدەلە وتىرىپ باعا بەرگەن. بۇل ءتىزىمنىڭ العاشقى بەستىگىندە الەمدىك رەيتينگتى باعىندىرعان جوعارى وقۋ ورىندارى جوق. وسى ورايدا، قر «اتامەكەن» ۇقپ جاريالاعان رەيتينگتە ءبىرىنشى ورىن العان م.س. نارىكباەۆ اتىنداعى كازگيۋ ۋنيۆەرسيتەتى باسقارما توراعاسى تالعات نارىكباەۆ بىلاي دەيدى.
«QS ءوز رەيتينگىنىڭ ناتيجەسىن جوو بەرگەن اقپاراتقا سۇيەنىپ شىعارادى، ولار ونى قايتا تەكسەرمەيدى. ءبىرىنشى كەزەكتە ءبىلىم ساپاسىن ارتتىرىپ، رەيتينگ سوڭىنان قۋماعان ابزال»،- دەيدى تالعات نارىكباەۆ.
