قىزىلوردا وبلىسى اكىمىنىڭ ءباسپاسوز حاتشىسى قىزمەتىن اتقارعان باقىتجان وماروۆ جاڭا قىزمەتكە تاعايىندالدى. ەندىگى تاڭدا باقىتجان وماروۆ قر مادەنيەت جانە سپورت مينيسترلىگىنىڭ حالىقارالىق تۇركسوي ۇيىمىنداعى وكىلى لاۋازىمىندا.
1987 جىلى الماتى قالاسىندا ومىرگە كەلگەن باقىتجان وماروۆ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ حالىقارالىق قاتىناستار ماماندىعىن بىتىرگەن، ارتىنشا وسى ۋنيۆەرسيتەتتىڭ جۋرناليستيكا ماماندىعىنىڭ ماگيستراتۋراسىن اياقتاعان. "قازاقستان" رترك، "حابار" ارنالارىندا جاۋاپتى قىزمەتتەردى اتقارعان. جاڭا قىزمەتكە تاعايىندالۋ جايىندا باقىتجان وماروۆ ءوزىنىڭ فەيسبۋك پاراقشاسىندا جازدى.
"قادىرلى جەرلەستەر! جاناشىر ارىپتەستەر!
بۇگىننەن باستاپ قىزىلوردا وبلىسى اكىمىنىڭ ءباسپاسوز حاتشىسى قىزمەتىم اياقتالدى.
سىر توپىراعىنىڭ پەرزەنتى رەتىندە تۋعان ەلىمە قىزمەت ەتۋ باقىتى بۇيىرعان كەزدە شاقىرتۋدى قۋانىشپەن قابىلدادىم. مەن ءۇشىن وبلىس اكىمى گۇلشارا ناۋشاقىزىنىڭ كومانداسىندا جۇمىس ىستەۋ مول مۇمكىندىك پەن ۇلكەن تاجىريبە بەردى. العان ءبىلىمىم مەن جيعان تاجىريبەم نەگىزىندە مەملەكەتتىك قىزمەتتە ابىرويلى جۇمىس ىستەۋگە تالپىندىق. ماعان قولداۋ ءبىلدىرىپ، جاناشىرلىق تانىتقان بارشا ازاماتتارعا، تىلەۋلەس ارىپتەستەرگە العىسىم شەكسىز. ءباسپاسوز قىزمەتىن جۇرگىزۋ ارقىلى جاڭا ورتا تاۋىپ، بيلىك پەن حالىق اراسىنا ورتاق دانەكەر بولا بىلدىك دەپ سانايمىن. ەندىگى قىزمەتىم تۇركيا مەملەكەتىندە جالعاسادى. قر مادەنيەت جانە سپورت مينيسترلىگىنىڭ حالىقارالىق تۇركسوي ۇيىمىنداعى وكىلى لاۋازىمدى قىزمەتىنە تاعايىندالدىم. جاۋاپتى قىزمەتتى سەنىپ تاپسىرعان ۇيىمنىڭ باس حاتشىسى دۇيسەن قورابايۇلىنا، قر مادەنيەت جانە سپورت ءمينيسترى اكتوتى راحمەتوللاقىزىنا العىس بىلدىرەمىن.ەل يگىلىگىنە قىزمەت ەتىپ، باۋىرلاس مەملەكەتتەردىڭ مادەني ىنتىماقتاستىعىن ارتتىرۋعا كۇش سالاتىن بولامىن. ماعان اركەز دەمەۋ بىلدىرگەن بارشاڭىزعا قۇرمەتىم شەكسىز. اللا ابىرويدان ايىرماسىن!" دەگەن جازبا قالدىرعان.
"ادىرنا" ۇلتتىق پورتالىنىڭ ۇجىمى باقىتجان باۋىرجانۇلىن جاڭا قىزمەتكە تاعايىندالۋىمەن قۇتتىقتاپ، جەتىستىك پەن تابىس تىلەيدى.
"ادىرنا" ۇلتتىق پورتالى
