بۇل كىتاپتار قازاق مەكتەپتەرىندەگى اعىلشىن ءتىلىن وقىتۋعا ارنالعان وقۋلىقتار. قر ءبىلىم جانە عىلىم مينيسترلىگى ساراپتاماسىنىڭ وڭ قورىتىندىسىن الىپ، وقىتۋ باعدارلاماسىنا ەنگىزىلگەن.
كىتاپ قازاقستان مەكتەپتەرى ءۇشىن دايارلانسا دا، اۋدارما نۇسقادا. ەكسپرەسس پابليشين باسپاسى شىعارعان.
ياعني ءتول باعدارلاما ەمەس.
بىردەن وزگە ەلدىڭ يدەولوگياسىن ءسىڭىرۋ.
سۋرەتتەردەن كورىپ وتىرعاندارىڭىزداي، ەكى-ءۇش مەملەكەتتىڭ تۋىمەن، سول ەلدەرگە ءتان ەرەكشەلىكتەرمەن قويىلعان سۋرەتتەردە ءوز ەلىندە وگەيلىك كورگەندەي، قازاقستان ۇنەمى ەڭ سوڭىندا، تومەنگى جاعىنا ورنالاستىرىلعان.
تاعى ءبىر ماسەلە، كىتاپتاردىڭ ءون بويىندا قازاق بالالارىنىڭ كەلبەتى بۇرمالانىپ، سايقىمازاق سياقتى سالىنعانى نەسى دەگەن سۇراق تۋىندايدى. ءبىر جەرىندە تۇلىمىن جەلبىرەتىپ، باسىن تاقىرلاپ سالسا، ەندى بىردە ەرنىن بوياپ قويادى، ەندى بىردە قازاقى كويلەكتەگى ۇل بەينەسىندە بەرەدى.
ەكىنشى سىنىپقا ارنالعان وقۋلىقتا قازاقتىڭ ۇلتتىق تاعامى رەتىندە لاعماندى كورسەتسە، ۇلتتىق ءداستۇرىمىزدىڭ ىشىندە پاسحا مەن ماسلەننيتسا نەگە ءجۇر؟
قاپ-قارا قولمەن قازاقتىڭ ويۋى بەلگىلەنگەن كەسەدەن شاي دا ۇسىنعان سۋرەتتەردى بايقايمىز. ونداي قولدان كىم شاي ىشكىسى كەلەدى؟
بۇل تىپتەن سوراقىلىق.
شەكتەن شىققاندىق!
ادامنىڭ دەنە مۇشەلەرىن تانىستىرعاندا، جالبىراعان شاشتى ۇسقىنسىز سۋرەتتەن شوشىپ تا كەتەسىڭ.
كىتاپتىڭ ونە-بويىندا بالا ۇعىمىنا، پسيحولوگياسىنا كەرى اسەر ەتەتىن، قازاقتىڭ ۇلتتىق ۇعىمىنا، ءداستۇرلى تاربيەسىنە كەلمەيتىن، شەت ەلدىڭ يدەولوگياسىن ناسيحاتتايتىن يلليۋستراتسيالار مەن ماتىندەردى كوپتەپ كەزدەستىرۋگە بولادى. وسىلايشا، تەرە بەرسەڭ شىعا بەرەدى.
سوندىقتان، وقۋلىقتاردى ساراپتامادان وتكىزگەندە، ونى بەكىتكەندە، باسپاعا جىبەرەر الدىندا ەڭ الدىمەن قازاقستاننىڭ بولاشاعىنا جاۋاپ بەرەتىن، ۇلتتىق ۇستىنى مىقتى، ءوز وتانىن اسا قادىرلەيتىن ۇرپاق تاربيەلەۋ ءۇشىن نە قاجەت دەگەن ساۋالدى ءبىرىنشى ورىنعا شىعارعان دۇرىس دەپ ەسەپتەيمىن!
بۇل ماسەلەنى كەشەندى تۇردە باقىلاۋعا الاتىنىمدى مالىمدەيمىن.
ماقپال مىسا،
"ادىرنا" ۇلتتىق پورتالى
