«كۇمىس القاسىن» بەرمەگەن: كوپ بالالى انا ءتيىستى جەڭىلدىكتەردى الا الماي ءجۇر

3011
Adyrna.kz Telegram

الماتى وبلىسىندا 6 بالانىڭ اناسى وزىنە تيەسىلى «كۇمىس القاسىن» الا الماي ءجۇر، دەپ حابارلايدى «ادىرنا» ۇلتتىق پورتالى «ەۋرازيا» ارناسىنا سىلتەمە جاساپ.

ەسكەلدى اۋدانىنىڭ تۇرعىنى گۇلنار تۇرالباەۆا مەملەكەتتىك ناگراداعا بىلتىر ءوتىنىش بەرگەن. ارادا ءبىر جىلعا جۋىق ۋاقىت وتسە دە ءتيىستى ورگاندار ەشقانداي جاۋاپ جولداماعان. اكىمدىككە بارسا، «كۇتىڭىز» دەگەن ءسوزدى عانا ەستيتىنىن ايتتى.

«بالام ەندىگى ايدا ەكى جاسقا تولادى. ماعان تيەسىلى «كۇمىس القانى» بەرمەي وتىر. مەن جەڭىلدىكتەردەن قاعىلىپ وتىرمىن. ءبىر جىلدىڭ وزىندە 200 مىڭداي اقشا بەرىلۋى كەرەك ەدى، بىراق وعان دا قول جەتكىزە المادىم»، – دەيدى كوپ بالالى انا گۇلنار تۇرالباەۆا.

ال جەرگىلىكتى اكىمدىكتەگىلەر گۇلنار تۇرالباەۆانىڭ ءوتىنىشىن وتكەن جىلدىڭ تامىزىندا قابىلداعاندارىن ايتتى. بارلىق قۇجاتتاردى تەكسەرىپ، ارى قاراي ءتيىستى ورگاندارعا جولداعان. كەيىن پرەزيدەنت اكىمشىلىگىنەن قۇجاتتار قايتا تەكسەرۋ ماقساتىندا كەرى قايتارىلىپتى.

«24 جەلتوقسان كۇنى پرەزيدەنت اپپاراتىنان قۇجاتتارى قايتىپ كەلدى. 3-بالانىڭ تۋ تۋرالى كۋالىگى بازادان دۇرىس شىقپاعان. سودان كەيىن ءبىز 14 قاڭتار كۇنى قايتادان قۇجاتتارىن وتكىزىپ جىبەردىك. 2 ماۋسىم كۇنى پرەزيدەنتتىڭ 588-قاۋلىسىمەن ناگراجدەنيا بولدى. پرەزيدەنت اپپاراتىنان القاسى كەلگەننەن كەيىن، ءبىز القاسىن ول كىسىگە تابىستايمىز»، – دەيدى ەسكەلدى اۋدانى اكىمى اپپاراتىنىڭ باس مامانى مارجان مانارقىزى.

"ادىرنا" ۇلتتىق پورتالى

پىكىرلەر