قر دەنساۋلىق ساقتاۋ مينيسترلىگى ءتاتتى، گازدالعان سۋسىندارعا بيىل سالىقتى 7 پايىزعا كوبەيتۋدى ۇسىنىپ وتىر دەپ حابارلايدى «ادىرنا» ۇلتتىق پورتالى «Qazaqstan» ۇلتتىق ارناسىنا سىلتەمە جاساپ.
سەبەبى قۇرامىندا قانتى كوپ سۋسىنداردى تۇتىنۋ سالدارىنان ەلىمىزدە قانت ديابەتى، سەمىزدىك جانە جۇرەك قان تامىرى اۋرۋلارى كوبەيىپ بارادى. ماسەلەن، تەك قانت ديابەتىنە شالدىققاندار سوڭعى بەس جىلدا 31 پايىزعا ءوسىپ، ناۋقاستار سانى 400 مىڭعا جۋىقتاعان. ەگەر بۇلاي جالعاسا بەرسە 2030 جىلعا قاراي ناۋقاس سانى 1 ميلليوننان اسادى دەپ بولجاپ وتىر ماماندار.
سوڭعى جىدارى بۇل اۋرۋ «جاسارىپ» بارادى. قانت ديابەتىمەن قارتتار عانا ەمەس، كىشكەنتاي بالالار دا اۋىرادى.
— 3 جاستان باستاپ قانت ديابەتى دياگنوزى قويىلعان بالالار بار. بۇل ءبىزدىڭ قازاقستان ءۇشىن جاقسى كورسەتكىش ەمەس، - دەيدى دارىگەر-تەراپەۆت اقتولقىن نۇرماحانقىزى.
دارىگەرلەردىڭ ايتۋىنشا، مۇنىڭ سەبەبى، ەلدەگى ءار ەكىنشى بالا ءتاتتى سۋسىنعا اۋەس. ءتاتتى، گازدالعان، ەنەرگەتيكالىق سۋسىندار، شىرىندار مەن سالقىنداتىلعان ءتاتتى شايلاردى كوپ تۇتىنۋدىڭ سالدارىنان بالالاردىڭ ءتىسى ءشىرىپ، سەمىزدىك بەلەڭ الىپ بارادى. ەلدەگى 6 ملن بالانىڭ 3,2 پايىزى سەمىزدىككە شالدىققان. حالىقتىڭ 20 پروتسەنتى ارتىق سالماقپەن كۇرەسىپ الەك. سوڭعى 5 جىلدا جۇرەك-قان تامىرلارى اۋرۋلارى 16 پروتسەنتكە وسكەن.
وسىعان بايلانىستى دەنساۋلىق ساقتاۋ مينيسترلىگى سالىقتى كوبەيتىپ، قولجەتىمدى تاۋاردى قىمباتتاتقاندا عانا تۇتىنۋ ازايادى دەگەن ۇمىتتە. سول سەبەپتى 2021-2025 جىلدارعا ارنالعان «دەنى ساۋ ۇلت» باعدارلاماسى اياسىندا بيىل 17 پايىز، ال 2025 جىلعا دەيىن سالىقتى 45 پايىزعا جەتكىزۋدى ۇسىنىپ وتىر.
— الەمنىڭ 40 ەلى وسى اكتسيزدى كوتەردى. قازاقستاندا وسى ماسەلەنى زەرتتەۋدە. ۇسىنىس رەتىندە جاسالىپ جاتىر. ويتكەنى ەرەسەكتەر مەن بالالاردىڭ اراسىندا سەمىزدىك پەن قانت ديابەتى ارتۋدا، – دەدى قر دسم قوعامدىق دەنساۋلىق ساقتاۋ ۇلتتىق ورتالىعى قوعامدىق دەنساۋلىقتى نىعايتۋ ورتالىعىنىڭ باسشىسى جانار قالماقوۆا.
ال الكوگولسىز سۋسىن وندىرۋشىلەر قاۋىمداستىعى بۇعان قارسى. سەبەبى، اكتسيز ەنگىزىلسە، سۋسىن وندىرەتىن كاسىپورىندار داعدارىسقا ۇشىرايدى. ەلدە مۇنداي كومپانيا سانى 400-دەن اسادى.
— ءبىز قارسىمىز. سەبەبى بۇل كاسىپكەرلەرگە ۇلكەن سوققى. وزدەرىڭىز بىلەسىزدەر، قازىر ءبارى قىمبات. قانت باعاسى، شيكىزات، ەلەكتر ەنەرگياسى ارتىپ جاتىر. ەگەر 20 پايىز ەنگىزىلسە شاعىن جانە ورتا كاسىپ 26 پايىزعا قىسقارادى. 12000 ادام جۇمىستان ايىرىلادى. قانتتىڭ زيانى ءالى تولىق زەرتتەلمەگەن تاقىرىپ. سوندىقتان اقىلعا قونىمسىز. بارلىعىن تارازىعا سالۋ كەرەك، – دەيدى الكوگولسىز سۋسىن وندىرۋشىلەر قاۋىمداستىعىنىڭ پرەزيدەنتى اليا مامىتباەۆا.
ۇسىنىستىڭ نۇكتەسىن قوياتىن ۇلتتىق ەكونوميكا مينيسترلىگى ىستىڭ ءالى قارالىپ جاتقانىن ايتىپ، قانداي دا ءبىر تۇسىنىكتەمە بەرۋگە ءالى ەرتە دەپ وتىر.
ەگەر وسى سۋسىندارعا قوسىمشا تاعى 7 پايىز سالىق سالىنسا، وندا ولاردىڭ باعاسى 7 ەسە قىمباتتايدى. دەمەك ءبىر قۇتىنىڭ باعاسى 1000 تەڭگە بولۋى مۇمكىن. ازىرگە بۇل ۇسىنىس قانا.
«ادىرنا» ۇلتتىق پورتالى.
