«ديرەكتور قىسىم كورسەتكەن»: 9-سىنىپتى بىتىرگەن وقۋشى وزىنە قول جۇمسادى

4271
Adyrna.kz Telegram

جەلىدە تۇركىستان وبلىسىنداعى مەكتەپ ديرەكتورى 9-سىنىپ وقۋشىسىن ءوز-وزىنە قول جۇمساۋعا دەيىن جەتكىزدى دەگەن اقپارات تارادى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.

الەۋمەتتىك جەلىدە تۇركىستان وبلىسى، ورداباسى اۋدانىنىڭ تۋماسى نۇرداۋلەت مىقتىبەكوۆ ەسىمدى تۇرعىن مەكتەپ ديرەكتورىنىڭ قارىنداسىن ءوزىن-ءوزى ولتىرۋگە دەيىن جەتكىزگەنى تۋرالى ايتىپ، ادىلدىك سۇرادى.

«قۇرمەتتى تۇركىستان وبلىسىنىڭ اكىمى ومىرزاق شوكەەۆ، قۇرمەتتى باس پروكۋرور عيزات نۇرداۋلەتوۆ، ىشكى ىستەر ءمينيسترى ەرلان تۇرعىنباەۆ، ءبىلىم ءمينيسترى اسحات ايماعامبەتوۆ، بالالار قۇقىعىن قورعاۋشى ارۋجان ساين. 2021 جىلى 2 ماۋسىم كۇنى، ءبىر اپتا بۇرىن 9-سىنىپتى بىتىرگەن قارىنداسىم مىقتىبەك ەلۆيرا وزىنە-ءوزى قول جۇمسادى.  قارىنداسىمدى ءوز-وزىنە قول جۇمساۋعا يتەرمەلەگەن جانە ونىڭ ولىمىنە كىنالى بىردەن ءبىر ادام مەكتەپ ديرەكتورى ستاەۆا ايسارا نۋرجيگيتوۆنا دەپ ەسەپتەيمىن. ەلۆيرا ۇزدىك اتتەستاتتان ءۇمىتتى مەكتەپتەگى ءۇش وقۋشىنىڭ ءبىرى بولدى. الايدا ديرەكتور ۇزدىك بىتىرۋگە بارىنشا كەدەرگى كەلتىرىپ، ەمتيحاندا قىسىم كورسەتكەن»، – دەيدى نۇرداۋلەت مىقتىبەكوۆ.

ول ديرەكتور قارىنداسىن ەمتيحاننان كەيىن الىپ، تاعى دا قىسىم كورسەتىپ، باعاسىن كەمىتەمىن دەپ قورقىتقانىن ايتادى. كوپ ۇزاماي قىز ءۇيىنىڭ اۋلاسىندا وزىنە قول جۇمساپتى.

«ەمتيحاندا توبەسىنەن ءتونىپ تۇرىپ باقىلاعان. «سەن ۇشكە وقيتىن وقۋشىسىڭ، سەنىڭ باعاڭدى 10 بالل كەمىتەمىن» دەپ وقۋشىلاردىڭ كوزىنشە ايتقان. ەمتيحاننىڭ سوڭىندا جەكە الىپ قالعان. نە ايتىپ، نە قىسىم جاساعانى بەلگىسىز. سىرتقا شىققاندا قارىنداسىم قاتتى ىزالانىپ، جىلاپ شىققان. بۇعان ءۇي ءىشى، مۇعالىمدەر مەن سىنىپتاستارى دا كۋا. قالعان ۇزدىك اتتەستاتقا ۇمىتكەر وقۋشىلارعا قىسىم كورسەتپەگەن. ولاردان اقشا الۋى دا مۇمكىن. اۋىل اراسىندا ونداي اڭگىمە دە بار. وسىنداي قىسىمنان كەيىن بۇعان دەيىن بەسكە وقىعان قارىنداسىم ءبىر ساباقتان ءتورت شىعىپ، قاتتى كۇيزەلىسكە ۇشىراپ، ءۇي اۋلاسىندا ارقانعا اسىلىپ، كوز جۇمدى»، – دەيدى ول.

وقيعاعا قاتىستى تۇركىستان وبلىستىق پوليتسيا دەپارتامەنتىنىڭ باسشىسى تۇسىنىكتەمە بەردى. قازىرگى تاڭدا جاعداي باقىلاۋعا الىنعان، ءتيىستى تەرگەۋ شارالارى جۇرگىزىلىپ جاتىر.

«اتالعان جايت بويىنشا تۇركىستان وبلىسى پوليتسيا دەپارتامەنتىنىڭ بىلىكتى تەرگەۋشىلەرىمەن قر قك-ءنىڭ 105-بابى «ءوزىن-ءوزى ولتىرۋگە دەيىن جەتكىزۋ» بويىنشا سوتقا دەيىنگى تەرگەۋ جۇمىستارى جۇرگىزىلۋدە جانە قاجەتتى دەگەن بارلىق جان-جاقتى شارالار جۇزەگە اسىرىلۋدا. ونىڭ ىشىندە مەكتەپ ۇجىمىنان، مۇعالىمدەر مەن وقۋشىلار اراسىندا جاۋاپتار الىنۋدا. ءتيىستى ساراپتامالار دا تاعايىندالدى. ءىستىڭ زاڭ اياسىندا جۇرگىزىلۋى قاداعالاۋدا»، – دەيدى تۇركىستان وبلىسى پوليتسيا دەپارتامەنتىنىڭ باسشىسى ق.دالبەكوۆ.

"ادىرنا" ۇلتتىق پورتالى

پىكىرلەر