ەلىمىزدە 32 پەدوفيل جىل سوڭىنا دەيىن بوستاندىققا شىعادى. زورلىق-زومبىلىق جاساعاندارعا ءماجبۇرلى تۇردە حيميالىق كاستراتسيا جاسالمايدى. ولار شىققاننان كەيىن مىنەز-قۇلقىنا بايلانىستى التى ايدان ءۇش جىلعا دەيىن پوليتسيانىڭ باقىلاۋىندا بولادى. دەگەنمەن ەركىن ومىرگە ورالعان پەدوفيلدەر قايتا قىلمىس جاسايدى. پسيحولوگتار مەن قۇقىق قورعاۋشىلار وسىلاي دەپ دابىل قاعىپ وتىر، دەپ حابارلايدى «ادىرنا» ۇلتتىق پورتالى «حابار 24» ارناسىنا سىلتەمە جاساپ.
بىلتىر بالالارعا قاتىستى ءۇش جۇزدەن اسا زورلىق-زومبىلىق قىلمىسى تىركەلىپتى. بۇل تەك بەلگىلى بولعان دەرەكتەر. ال جىنىستىق سيپاتتاعى ارەكەتتەردى اتا-انالار كوپ جاعدايدا جاسىرىپ قالادى. پسيحولوگتارعا جۇگىنۋ دە سيرەك كەزدەسەدى.
«مۇنداي جاعدايعا تاپ بولعان بالانىڭ پسيحولوگياسىنا زاقىم كەلەدى. ونى ءاپ-ساتتە ەمدەۋ مۇمكىن ەمەس. ول ءۇشىن ۇزاق جۇمىس ىستەۋ قاجەت. زورلىق-زومبىلىقتان امان قالعان بالانىڭ مىنەز-قۇلقىندا اۋىتقۋ بولىپ، وزىنە زيان كەلتىرۋى دە مۇمكىن. بىزدە تەك قىز بالاسى زورلىق-زومبىلىققا ۇشىرايدى دەگەن وي قالىپتاسقان. وكىنىشتىسى، ۇلدار دا، جاستار دا جابىرلەنىپ جاتادى»، - دەدى «قورعاۋ استانا» قورىنىڭ جەتەكشىسى اننا رىل.
سوتتالعان پەدوفيل بوستاندىققا شىققاننان كەيىن بۇرىنعى قىلمىسىن قايتا جاسايدى دەيدى پسيحولوگتار. بۇعان ستاتيستيكا دالەل. قازىرگى ۋاقىتتا 2 مىڭعا جۋىق ادام جازاسىن وتەپ جاتىر، ولاردىڭ 20 پروتسەنتى پەدوفيل-رەتسيديۆيستەر.
«پەنيتەنتسيارلىق پروباتسيا زاڭدارىنا سايكەس، قىلمىسكەردى بوستاندىققا شىعارار الدىندا ءبىر جىل بۇرىن دايىندىق باستالادى. ياعني الەۋمەتتىك نەمەسە باسقا كومەك كورسەتۋدىڭ بارلىق مۇمكىندىكتەرى ەسكەرىلەدى. مىسالى، ەگەر سوتتالعان ادامنىڭ جەكە باسىن كۋالاندىراتىن قۇجاتتارى بولماسا نەمەسە زەينەتاقى، جاردەماقى الۋ بويىنشا قانداي دا ءبىر قۇجاتتاردى رەسىمدەۋگە مۇقتاج بولسا، جاردەم كورسەتىلەدى. سونداي-اق بوساتىلعاننان كەيىن ونىڭ جۇمىسقا ورنالاسۋ مۇمكىندىگى بار. سوندىقتان بوساتاندىققا شىققاننان كەيىن جەرگىلىكتى اتقارۋشى ورگاندار كومەك كورسەتەدى»، - دەدى قر ءىىم قىلمىستىق-اتقارۋ جۇيەسى كوميتەتىنىڭ باسقارما باستىعى بيبىگۇل مۇڭايتپاسوۆا.
سوتتالعانداردى بوستاندىققا جىبەرۋ بارىسىندا زەينەتاقى مەن جاردەماقى راسىمدەيدى. ولارمەن پسيحولوگتار دا جۇمىس ىستەيدى. الايدا قۇقىق قورعاۋشىلاردىڭ پىكىرىنشە، بۇل ءتيىمسىز. بوستاندىققا شىققاندار قوعام ءۇشىن قاۋىپتى. سەبەبى ولاردىڭ 90 پروتسەنتى وزگەرمەيدى دەيدى مامان.
«بىزگە ۇسىنىلعان كەيستە 24 جاستاعى ادامنىڭ ماس كۇيىندە جاساعان ۇكىمىن زەرتتەدىك. وندا قىلمىسكەر بۇلدىرشىنگە قاتىستى اۋىر قىلمىس جاسادى. ياعني ول جازىقسىز بالانى زورلاعان. ءبىز بۇل ىستەن باس تارتتىق. سەبەبى مۇنداي ادامدارمەن تۇرمەدە پسيحوتەراپەۆت، پسيحولوگ، تەراپەۆت جۇمىس ىستەۋى كەرەك. بىراق بۇل قىزمەتتەر كەشەنى ايماق اۋماعىندا ۇيىمداستىرىلماعان. بىزدە وكىنىشكە وراي، جۇيە جوق»، - دەدى «پراۆو» قورىنىڭ جەتەكشىسى ولگا رىل.
ەلىمىزدە قىلمىسكەرلەرمەن قوعامدىق ۇيىمدار دا جۇمىس ىستەۋدەن باس تارتادى. مىسالى، اقش-تا حيرۋرگيالىق كاستراتسياعا رۇقسات ەتىلەدى، ال گەرمانيادا پەدوفيلدەر ماجبۇرلەپ ەمدەۋگە جىبەرىلەدى. ولاردا پەدوفيلدەر تۋرالى دەرەكتەر اشىق جاريالانىمدا. قازاقستاندا دا وسىنداي سايت بار. ءاربىر اتا-انا ازعىنداردىڭ مەكەن-جايىنا دەيىن بارلىق اقپاراتتى بىلە الادى.
"ادىرنا" ۇلتتىق پورتالى
