2015 جىلى قر ۇلتتىق مۋزەيى «ۇلتتىق مۋزەيگە سىي تارتۋ» اكتسياسىن باستاعان بولاتىن. وسىناۋ اكتسياسى بارىسىندا جينالىپ، مۋزەيدىڭ قورىنان ورىن العان جادىگەرلەردىڭ قاتارىندا ەل تاريحى ءۇشىن باعاسى ارتىق، قۇنى ولشەۋسىز كەنەن ازىرباەۆتىڭ دومبىراسى مەن قۇران كىتابى، ءشامشى قالداياقوۆقا 1965 جىلعى 4 اقپاندا شىمكەنت وبلىسىنىڭ جاستارى سىيعا تارتقان «كۋبان» پيانينوسى مەن سازگەردىڭ قاراكول بورىگى، ءازىلحان نۇرشايىقوۆتىڭ «Nikon» فوتواپپاراتى، ەرمەك سەركەباەۆتىڭ 70 جىلدىعىنا ن.نازارباەۆ سىيلاعان قول ساعاتى، وزبەگالى جانىبەكوۆتىڭ «تسەنزور» قايشىسى، مادينا ەراليەۆانىڭ بايانى، جۇمەكەن ناجمەدەنوۆتىڭ كۇلسالعىشى، روزا باعلانوۆانىڭ ساحنالىق كويلەگى بار. مۋزەي قورىنا الىنعان وسىناۋ جادىگەرلەردىڭ بارلىعى ارنايى مامانداردىڭ سۇزگىسىنەن ءوتىپ، سۇرىپتالدى، قاجەت دەپ تابىلعانى مۋزەي رەستوۆراتورلارىنىڭ شەبەرحاناسىندا قالپىنا كەلتىرىلدى. وڭدەۋدەن وتكەن جادىگەرلەر ەكپوزيتسياعا قويىلدى. مۋزەيگە كەلگەن مەيماندار وسىناۋ جادىگەرلەردى دە تاماشالاپ ءجۇر.
كۇللى قازاق دالاسىنداعى قۇندى جادىگەرلەردى جيناۋدى ماقسات تۇتقان ۇلتتىق مۋزەي 2017 جىلعى 25 قىركۇيەكتە سولتۇستىك قازاقستان وبلىسىنىڭ ورتالىعى پەتروپاۆل قالاسىندا دا «ۇلتتىق مۋزەيگە سىي تارتۋ» اكتسياسىن وتكىزدى. قىزىلجار وڭىرىندە وتكەن اكتسيادا قوجابەرگەن جىراۋ، شال اقىن، توقسان بي جابايۇلى، ماعجان جۇماباەۆ سىندى اقىن-جىراۋ، بي-شەشەندەرگە ارنالعان كىتاپتار، ولاردىڭ فوتوسۋرەتتەرى، شوقان ءۋاليحانوۆتىڭ اجەسى ايعانىمنىڭ قىستاۋىندا قولدانىلعان اس ءۇي تەگەنەسى مۋزەي قورىنا الىندى. پەتروپاۆلدا وتكەن اكتسياعا بارلىعى 21 ادام قاتىسىپ 236 جادىگەردى ۇلتتىق مۋزەيگە تابىستادى.
«ۇلتتىق مۋزەيگە سىي تارتۋ» اكتسياسى ۇيىمداستىرىلعان الماتى، قىزىلوردا، اقتوبە، شىمكەنت، قوستاناي ورال قالالارىنىڭ قاتارىنا قىزىلجار ءوڭىرى دە قوسىلدى. الداعى ۋاقىتتا ەلىمىزدىڭ وزگە وڭىرلەرىندە دە بۇل اكتسيا وتكىزىلەتىن بولادى.
قر ۇلتتىق مۋزەيىنىڭ ءباسپاسوز قىزمەتى
