اقپارات جانە قوعامدىق دامۋ ءمينيسترى ايدا بالاەۆا حالىق الدىنداعى ەسەپتىك كەزدەسۋىندە اقپاراتقا قول جەتكىزۋ مۇمكىندىكتەرىن كەڭەيتۋگە باعىتتالعان شارالاردى اتادى، دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
«اقپاراتقا قول جەتكىزۋ ماسەلەسىنە مەملەكەت باسشىسى ءوزىنىڭ جولداۋىندا ەرەكشە نازار اۋدارعانى تەگىن ەمەس. اقپاراتقا قول جەتكىزۋ تۋرالى زاڭ قابىلدانعان ساتتەن باستاپ وعان تۇجىرىمدامالىق وزگەرىستەر ەنگىزىلمەگەن ەدى. وسىعان بايلانىستى، قاجەتتى تۇزەتۋلەر پاكەتى ازىرلەندى، وعان پرەزيدەنت 2020 جىلعى 30 جەلتوقساندا قول قويدى»، - دەگەن مينيستر تۇجىرىمدامالىق تۇزەتۋلەردىڭ باسىمدىقتارىنا توقتالدى.
«بارلىق مەملەكەتتىك ورگانداردا اقپاراتقا قول جەتكىزۋ ماسەلەلەرى بويىنشا ۋاكىلەتتى تۇلعالار نەمەسە بولىمشەلەر ايقىندالدى. بيىل العاش رەت مەملەكەت باسشىسىنىڭ الدىنا ۇكىمەت اقپاراتقا قول جەتكىزۋ سالاسىنىڭ جاي-كۇيى تۋرالى ەسەپ ەنگىزىلەدى. اقپارات يەلەرىنىڭ ءتىزىمى كەڭەيتىلدى. ولاردىڭ قاتارىنا ورتالىق جانە جەرگىلىكتى اتقارۋشى ورگانداردىڭ فۋنكتسيالارىن ورىنداۋشىلار جاتادى. مەملەكەتتىك ورگاندارعا نورماتيۆتىك-قۇقىقتىق اكت جوبالارى مەن بيۋدجەتتىك باعدارلاما جوبالارىن جاريا تالقىلاۋدىڭ باستالعانى تۋرالى اقپاراتتىق حابارلامالاردى ينتەرنەت-رەسۋرستا ورنالاستىرۋ جونىندەگى تالاپ ەنگىزىلدى»، - دەدى اقپارات جانە قوعامدىق دامۋ ءمينيسترى.
