كۇنى كەشە ەلىمىزدىڭ جەتەكشى ۋنيۆەرسيتەتى مارتەبەسىنە يە،الدىڭعى قاتارلى ءبىلىم وردالارىنىڭ ءبىرى جانە بىرەگەيى ءال-فارابي اتىنداعى قازاق ۇلتتىق ۋنيۆەرسيتەتى 1 كۋرس جەتكىنشەكتەرىن ستۋدەنتتەر قاتارىنا قابىلدادى. قازاق ءبىلىمىنىڭ قارا شاڭىراعىنا تاعى دا ءبىر لەپ قوسىلدى.
بۇل كەشتىڭ ءاربىر جەتكىنشەككە ماڭىزى وتە زور. ولاردىڭ جانارىنان بولاشاققا دەگەن نىق سەنىممەن،ۇلكەن ارمان مۇراتتار بايقالادى. بۇل اسەرگە تولى ساتكە 11 قازان كۇنى ءو.ا.جولداسبەكوۆ اتىنداعى ستۋدەنتتەر سارايىنىڭ الاڭىندا كۋا بولدىق.
سالتاناتتى كەشتە العاشقىلاردىڭ ءبىرى بولىپ ءسوز العان قازۇۋ رەكتورى، اكادەميك عالىمقايىر مۇتانۇلى ستۋدەنتتەرگە ID كارتا مەن ءبىلىم كىلتىن تابىستاپ، جۇرەكجاردى قۇتتىقتاۋ ءسوزىن ايتتى. «ءبىزدىڭ ۋنيۆەرسيتەت الەمدىك دەڭگەيدەگى وقۋ ورنى جانە ءبىز جان-جاقتى دامىعان، باسەكەگە قابىلەتتى، ادامي قۇندىلىقتاردى يگەرگەن ءبىلىمدى ازامات تاربيەلەيمىز. وسى ورايدا بىزدە «Al-Farabi university – smart city» اۋقىمدى جوباسى جۇمىس ىستەيدى. ونىڭ نەگىزگى يدەياسى ادامگەرشىلك قۇندىلىقتاردى بويعا ءسىڭىرىپ، ءبىلىم تۇعىرىن بيىك ۇستاۋ»، -دەدى ۋنيۆەرسيتەت رەكتورى.
ءال-فارابي اتىنداعى قازۇۋ – قازاقستانداعى تاۋەلسىز كادرلار دايارلايتىن نەگىزگى ورتالىق، تالاي ستۋدەنتتىڭ بيىك شىڭدارعا جەتۋىنە سەبەپكەر بولعان قاسيەتتى مەكەن. بىلىكتى مامان، وتانشىل ازامات تاربيەلەۋدى ماقسات ەتكەن وقۋ ورنى ءبىلىم بەرۋ مەن عىلىمنىڭ وزىق ۇلگىلەرىن قولدانىسقا ەنگىزۋدە.
QS حالىقارالىق رەيتينگى بويىنشا بيىل 236-ورنىن ساقتاعان قازۇۋ الەمنىڭ ەڭ ۇزدىك 250 ۋنيۆەرسيتەتى قاتارىندا. ۇلتتىق رەيتينگ بويىنشا دا ۋنيۆەرسيتەت كوشباسشىلىعىن جىل سايىن دالەلدەپ كەلەدى. اتاپ ءوتۋ كەرەك، قازۇۋ ستۋدەنتتەرى مەن عالىمدارىنىڭ جوبالارى استانا قالاسىندا وتكەن حالىقارالىق «ەكسپو-2017» كورمەسىندە كورسەتىلدى. كۇنى بۇگىن ۋنيۆەرسيتەتتە 14 ستۋدەنتتىك بيزنەس-ينكۋباتور قارقىندى جۇمىس ىستەۋدە.
بولاشاققا قازۇۋ مەن بىرگە قادام باسۋدى ارمانداعان جاس تۇلەكتەر سانى دا جىل سايىن ارتىپ كەلەدى.
بيىل 7 مىڭعا جۋىق تالاپتى جاس قازۇۋ ستۋدەنتى اتاندى. ولاردىڭ 4098-ءى مەملەكەتتىك ءبىلىم گرانتىنىڭ، 897 التىن بەلگى يەگەرلەرى، 35 حالىقارالىق جانە رەسپۋبليكالىق وليمپيادا جەڭىمپازدارى، 187 نازارباەۆ ينتتەللەكتۋالدى مەكتەبىنىڭ تۇلەكتەرى، 300-گە جۋىق ءال-فارابي وليمپياداسىنىڭ جۇلدەگەرلەرى بار. بۇل – قازاقستاننىڭ جوعارى ءبىلىم بەرۋ تاريحىندا ەشقانداي وقۋ ورنى قول جەتكىزبەگەن ناتيجە.
ۋنيۆەرسيتەتكە قادام باسقان زاڭ فاكۋلتەتىنىڭ گرانت يەگەرى 110 توپ ستۋدەنتى ەرادىل يسابەكوۆ كەش جايلى جانە ۋنيۆەرسيتەت قابىرعاسىنداعى الداعى ماقساتتارى جونىندە : «ەلىمىزدىڭ ەڭ تاڭداۋلى ۋنيۆەرسيتەتىنىڭ ءبىلىم گرانتىنا يە بولعانىما قۋانىشتىمىن. قازۇۋعا كەلگەننەن باستاپ بويىمدى كەرەمەت سەزىم بيلەپ،تاڭ قالۋدى توقتاتار ەمەسپىن.
جاڭا ءومىرىمنىڭ ءدال وسى ءبىلىم ورداسىندا باستالعانىنا ماقتانامىن. ءبىزدى وسىلاي جوعارعى دەڭگەيدە قارسى الادى دەگەن وي ءۇش ۇيىقتاسام دا تۇسىمە كىرمەگەن ەدى. كەلگەنىمىزگە كوپ ۋاقىت بولماسا دا ۋنيۆەرسيتەت ومىرىنە ەتەنە ارالاسا باستادىق. بۇل ورايدا كۋراتورىمىز ازاماتتىق قۇقىق، ازاماتتىق ءىس جۇرگىزۋ جانە ەڭبەك كافەدراسىنىڭ اعا وقۋتۋشىسى حۋدايبەردينا گۋلنۋرعا العىسىمىز شەكسىز. الدا دا توبىمىزبەن تالاي اسۋلاردى باعىندىرىپ،ۋنيۆەرسيتەتىمىزدىڭ جاندانۋىنا ۇلەس قوساتىنىمىزعا سەنىمدىمىن» دەيدى.
كەش سوڭىندا ستۋدەنتتەر ۋنيۆەرسيتەتتىڭ بەتكە ۇستار شاكىرتى بولۋعا، ونىڭ ابىرويىن اسقاقتاتۋعا، باسەكەگە قابىلەتتى مامان بولۋعا انت ەتىپ، «گاۋدەامۋس» ءانىن حورمەن شىرقادى. ادەمى كەش ءداستۇرلى ستۋدەنتتەر ۆالسىمەن جالعاسىپ، قازۇۋ ونەرپازدارىنىڭ «جاساي بەر، قازۇۋ-ىم» ءانى قالاشىق اسپانىندا اۋەلەدى. كوڭىلدى مەرەكە بي كەشىنە ۇلاستى.
ەڭلىك ەرعاليقىزى
