بۇگىن – ديماش قۇدايبەرگەننىڭ تۋعان كۇنى

3708
Adyrna.kz Telegram

بۇگىن تالانتتى ءانشى ديماش قۇدايبەرگەن 27 جاسقا تولدى، دەپ حابارلايدى «ادىرنا» ءتىلشىسى.

ديماش قۇدايبەرگەن 24 مامىر 1994 جىلى اقتوبە قالاسىندا قازاقستان رەسپۋبليكاسىنىڭ مادەنيەت قايراتكەرلەرى قانات قۇدايبەرگەنۇلى مەن سۆەتلانا ايتباەۆا وتباسىندا دۇنيەگە كەلگەن. ەڭ العاش رەت سپەكتاكلدە ويناۋىمەن تانىلا باستادى. بەس جاسىندا مۋزىكالىق كوللەدج ساحناسىندا العاش ءانشى رەتىندە ءان سالعان. التى جاسىندا “اينالايىن” رەسپۋبليكالىق بايقاۋىنىڭ “فورتەپيانو” نوميناتسياسىندا جەڭىمپاز اتانعان. 2010 جىلى "بايقونىردىڭ اسەم داۋىستارى" حالىقارالىق فەستيۆالىنىڭ ءى جۇلدە لاۋرەاتى اتاندى. 2012 جىلى “جاس قانات” رەسپۋبليكالىق جاس ءان ورىنداۋشىلار بايقاۋىنىڭ گران-پري جۇلدەسىنە يە بولدى. 2012 جىلى “ۆوستوچنىي بازار” حالىقارالىق بايقاۋىندا ءى جۇلدە لاۋرەاتى اتاعىنا يە بولدى. ءبىر جىلدان سوڭ، “مەيكين ازيا” ءى حالىقارالىق فەستيۆالىنىڭ جەڭىمپازى بولىپ اتاندى. 2014 جىلى اقتوبە قالاسىندا ا.جۇبانوۆ اتىنداعى مۋزىكالىق كوللەدجىندە “اكادەميالىق ءان ورىنداۋ” فاكۋلتەتىن ءبىتىرىپ، قازاق ۇلتتىق ونەر ۋنيۆەرسيتەتىنىڭ “ەسترادا ونەرى” فاكۋلتەتىنە ءتۇستى.

ناعىز تانىمالدىق ۆيتەبسك قالاسىندا XXIV حالىقارالىق ەسترادالىق ءان ورىنداۋشىلار «سلاۆيان بازارى-2015» بايقاۋىندا گران-پري جەڭىپ العان سوڭ كەلگەن. ەكى كۇن ىشىندە، جاس ءانشى 175 ۇپاي جيناعان. ءبىرىنشى كۇنى ول كونستانتين مەلادزە كومپوزيتورىنىڭ «وپيات مەتەل» ءانىن، ال ەكىنشى كۇنى فرانتسۋز ءانشىسى گرەگوري لەمارشال رەپەرتۋارىنان الىنعان «Sos dun terien un detresse» ءانىن ورىندادى. 2015 جىلى 28 قازان كۇنى ىستامبۇلدادا ديماش قۇدايبەرگەنوۆ “Abu TV” حالىقارالىق ازيا-تىنىق مۇحيت فەستيۆالىندە قازاقستان رەسپۋبليكاسىنىڭ اتىنان العاش رەت قاتىستى.

27 ناۋرىزدا 2017 قازاقستاننىڭ سۇيىكتى ءانشىسى ديماش قۇدايبەرگەنوۆ "Top Chinese Music Awards" نوميناتسيانىڭ جەڭىمپازى اتاندى. ءانشىنىڭ PR-ديرەكتورى الپامىس شاريموۆتىڭ ايتۋى بويىنشا، ءبىزدىڭ ءانشى "ازياداعى ەڭ اتاقتى ءانشى" نوميناتسياسىن جەڭىپ الدى. ماراپاتتاۋ تسەرەمونياسى كەزىندە ديماش SOS d'un terrien en détresse ءانىن ورىنداعان.

15 ءساۋىر 2017 ديماش قۇدايبەرگەنوۆ قىتايداعى "Singer 2017" جوباسىندا ەكىنشى ورىن الدى.

ءانشىنىڭ اتا-اجەلەرى دە مۋزىكا ادامدارى. ءبىرى دومبىرادا ويناسا، ەكىنشىسىنىڭ ءان ايتۋعا بەيىمى مول. ونەر يەسىنىڭ راۋشان اتتى قارىنداسى، مانسۇر اتتى ءىنىسى بار.

«ادىرنا» ۇلتتىق پورتالى

پىكىرلەر