ەلىمىزدەگى ەرەكشە ەسىمدەر انىقتالدى. ولاردىڭ اراسىندا بايدىبەكەكسپو، سامميت سىندى ەسىمدەر بار. بۇل تۋرالى «ادىرنا» ۇلتتىق پورتالى ەۋرازيا ءبىرىنشى ارناسىنا سىلتەمە جاساپ حابارلايدى.
بۇرىنعى كەزدە اتا-بابالارىمىز بالانىڭ دۇنيەگە كەلگەن ۋاقىتىنا قاراي ناۋرىزباي، بورانباي، جولدىباي دەگەن ەسىمدەر بەرسە، بۇگىندە سابيگە قويىلاتىن ەرەكشە ەسىمدەر مۇلدەم باسقا. مىسالى قازاقستاندا تۇڭعىش رەت 2011 جىلى ۇيىمداستىرىلعان قىسقى ازيا ويىندارى ۋاقىتىندا ەلىمىزدە تۋعان 40 نارەستە ازيادا ەسىمىن يەلەنگەن.
سونداي-اق ەلىمىزدە سامميت ەسىمدى 22 ەر بالا، سامميتا اتتى ءۇش قىز، 15 سامميتحان بار. مەملەكەتتىك ماڭىزى بار وقيعالاردى قالت جىبەرمەيتىن اۋلەتتەردە استانا، نۇرلىجول دەگەن ەسىمدەر دە كەزدەسەدى.
ال ىرسىموۆتار اۋلەتىندە 2017 جىلى دۇنيەگە كەلگەن بالانىڭ ەسىمى – بايدىبەكسپو قويىلعان.
ستاتيستيكالىق اگەنتتىكتىڭ اقپاراتىنا سۇيەنسەك سوڭعى ۋاقىتتارداعى ەرەكشە ەسىمدەردىڭ تىزبەگى مىناداي: رومەو، تەڭىز، ەدەلۆەيس، اقساقال ارىستانبەك، سامميداستانا، ەۆەرەست. سونىمەن قاتار 27 ءماسليحات، 21 ءماجىلىس، 13 نۇرلىجول، 9 نۇروتان، 7 سەنات، 7 پارتيا اتتى وتانداسىمىز بار.
"ادىرنا" ۇلتتىق پورتالى
