قىتاي ەلشىلىگىنىڭ الدىنا نارازىلىققا شىققانداردى جاۋاپكەرشىلىككە تارتىپ جاتىر

1080

اقپاننان بەرى لاگەردەگى تۋىستارىنىڭ جوعىن جوقتاپ الماتىداعى قىتاي ەلشىلىگىنىڭ الدىنا كەلىپ جۇرگەن قانداستار قاماۋعا الىنىپ، ولارعا ايىپپۇل سالىنىپ جاتىر، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.

سەگىز ادام بايبولات كۇنبولاتۇلى، گۇلپيا قازىبەك، قاليدا اقىتحان، گۇلباران ءومىرالى، نۇرزات ەرمەكباي، گۇلنۇر قوسداۋلەت، جاميليا ماكەن جانە اقيقات قاليوللا قىتاي كەلشىلىگىنىڭ الدىندا زاڭسىز ميتينگ ۇيىمداستىردى دەگەن ايىپپەن ۇستالعان.

ەلشىلىك الدىنا شىققانداردىڭ سوزىنشە، ءتارتىپ ساقشىلارى ولاردى قاماۋعا الىپ، ءبىر كۇن بويى تەرگەگەن.

«سەگىز ادام ەلشىلىكتىڭ الدىنا شىققان ەدىك. پوليتسەيلەر كەلىپ، التاۋىمىزدى كولىككە باسىپ الدى. قالعان ەكى ادامدى جولدان الىپ كەتىپ، اپارىپ تەرگەدى. تۇسكى ون ەكىدەن كەشكە دەيىن قاماۋدا ۇستادى. سەگىز ادامنىڭ التاۋىنا 61500 تەڭگە ايىپپۇل سالدى»، – دەيدى گۇلباران ومىرالىقىزى.

اعاسىنىڭ قىتاي لاگەرىنەن بوساتىلىپ، قازاقستانعا قايتقانىن قالايتىن الماحان مىرزا دا بەس ايدان بەرى ەلشىلىكتىڭ تابالدىرىعىن توزدىرعانداردىڭ ءبىرى. اعاسى ءۇشىن ادىلدىك سۇراعان ول ءالى كۇنگە دەيىن ەشقانداي جاۋاپ بولمادى دەپ نارازى.

«مەن تۋعان اعامدى ىزدەپ ەلشىلىكتىڭ تابالدىرىعىن توزدىرعانىما بەس اي ۋاقىت بولدى. اعامدى جازىقسىز 14 جىلعا سوتتاعان. اعام ەكىنشى دارەجەلى مۇگەدەك. سول كىسىنىڭ دەنساۋلىعى ءۇشىن الاڭداپ، ەلىشىلىككە كەلىپ ونى قازاقستانعا قايتارۋىن، ەڭ بولماسا، لاگەردەن بوساتۋىن سۇراپ، ارىز تالابىمدى جەتكىزگەنىمە بەس اي بولدى. بىراق جاۋاپ جوق»، – دەيدى الماحان مىرزا.

الماحان مىرزاعا دا رۇقساتسىز ميتينگىگە شىقتىڭ دەپ 61500 تەڭگە ايىپپۇل كەلگەن. ايىپپۇلدى ون كۇن ىشىندە تولەسىن دەگەن تالاپ قويىلىپتى. الايدا كيەر كيىمى مەن ىشەر اسىن ارەڭ تاۋىپ جۇرگەن كەلىنشەك، ايىپپۇل تولەيتىن قاراجاتىم جوق دەيدى.

«ماعان زاڭسىز، رۇقسات ەتىلمەگەن ميتينگىگە شىقتىڭ، قولىڭا پلاكات الىپ، نارازىلىق تانىتتىڭ دەگەن ايىپپەن 60 مىڭ كولەمىندە ايىپپۇل سالىندى. مەن ەشقانداي ميتينگىگە شىققان جوقپىن. تەك اعامنىڭ سۋرەتىن الىپ، ونىڭ قازاقستانعا قايتارىلۋىن سۇرادىم. قازىر ايىپپۇل تولەيتىن اقشام جوق. وعان قوسا، بۇل ميتينگى ەمەس، مەن ايىپپۇلدى نەگىزسىز سالىپ وتىر دەپ ەسەپتەيمىن»، – دەيدى كەلىنشەك.

قانشا جەردەن ايىپپۇل سالسا دا، اعام ءۇشىن كۇرەسۋدى جالعاستىرامىن دەيدى كەلىنشەك.

«قانشا ايىپپۇل سالىپ، جالا جاۋىپ، اقشا وندىرمەك بولسا دا، مەن اعام ءۇشىن كۇرەسۋدى جالعاستىرامىن. مەن ميتينگىگە شىققان جوقپىن، اعام ءۇشىن ادىلدىك سۇرادىم»، – دەيدى ول.

نارازىلىق بىلدىرۋشىلەردى ايىپپۇل توقتاتپايتىن سىڭايلى. ولار تالاپتارىنا جوعارىداعىلار قۇلاق اسقانشا قىتاي ەلشىلىگىنىڭ الدىندا نارازىلىق ءبىلدىرۋدى جالعاستىرماق.

"ادىرنا" ۇلتتىق پورتالى

(فوتو stan.kz سايتىنان)

پىكىرلەر
رەداكتسيا تاڭداۋى