Aqpannan beri lagerdegi týystarynyń joǵyn joqtap Almatydaǵy Qytaı elshiliginiń aldyna kelip júrgen qandastar qamaýǵa alynyp, olarǵa aıyppul salynyp jatyr, dep habarlaıdy «Adyrna» ulttyq portaly Stan.kz aqparat agenttigine silteme jasap.
Segiz adam Baıbolat Kúnbolatuly, Gúlpııa Qazybek, Qalıda Aqythan, Gúlbaran Ómiráli, Nurzat Ermekbaı, Gúlnur Qosdáýlet, Jamılıa Máken jáne Aqıqat Qalıolla Qytaı kelshiliginiń aldynda zańsyz mıtıng uıymdastyrdy degen aıyppen ustalǵan.
Elshilik aldyna shyqqandardyń sózinshe, tártip saqshylary olardy qamaýǵa alyp, bir kún boıy tergegen.
«Segiz adam elshiliktiń aldyna shyqqan edik. Polıeıler kelip, altaýymyzdy kólikke basyp aldy. Qalǵan eki adamdy joldan alyp ketip, aparyp tergedi. Túski on ekiden keshke deıin qamaýda ustady. Segiz adamnyń altaýyna 61500 teńge aıyppul saldy», – deıdi Gúlbaran Ómiráliqyzy.
Aǵasynyń Qytaı lagerinen bosatylyp, Qazaqstanǵa qaıtqanyn qalaıtyn Almahan Myrza da bes aıdan beri elshiliktiń tabaldyryǵyn tozdyrǵandardyń biri. Aǵasy úshin ádildik suraǵan ol áli kúnge deıin eshqandaı jaýap bolmady dep narazy.
«Men týǵan aǵamdy izdep elshiliktiń tabaldyryǵyn tozdyrǵanyma bes aı ýaqyt boldy. Aǵamdy jazyqsyz 14 jylǵa sottaǵan. Aǵam ekinshi dárejeli múgedek. Sol kisiniń densaýlyǵy úshin alańdap, elishilikke kelip ony Qazaqstanǵa qaıtarýyn, eń bolmasa, lagerden bosatýyn surap, aryz talabymdy jetkizgenime bes aı boldy. Biraq jaýap joq», – deıdi Almahan Myrza.
Almahan Myrzaǵa da ruqsatsyz mıtıngige shyqtyń dep 61500 teńge aıyppul kelgen. Aıyppuldy on kún ishinde tólesin degen talap qoıylypty. Alaıda kıer kıimi men isher asyn áreń taýyp júrgen kelinshek, aıyppul tóleıtin qarajatym joq deıdi.
«Maǵan zańsyz, ruqsat etilmegen mıtıngige shyqtyń, qolyńa plakat alyp, narazylyq tanyttyń degen aıyppen 60 myń kóleminde aıyppul salyndy. Men eshqandaı mıtıngige shyqqan joqpyn. Tek aǵamnyń sýretin alyp, onyń Qazaqstanǵa qaıtarylýyn suradym. Qazir aıyppul tóleıtin aqsham joq. Oǵan qosa, bul mıtıngi emes, men aıyppuldy negizsiz salyp otyr dep esepteımin», – deıdi kelinshek.
Qansha jerden aıyppul salsa da, aǵam úshin kúresýdi jalǵastyramyn deıdi kelinshek.
«Qansha aıyppul salyp, jala jaýyp, aqsha óndirmek bolsa da, men aǵam úshin kúresýdi jalǵastyramyn. Men mıtıngige shyqqan joqpyn, aǵam úshin ádildik suradym», – deıdi ol.
Narazylyq bildirýshilerdi aıyppul toqtatpaıtyn syńaıly. Olar talaptaryna joǵarydaǵylar qulaq asqansha Qytaı elshiliginiń aldynda narazylyq bildirýdi jalǵastyrmaq.
"Adyrna" ulttyq portaly
(foto stan.kz saıtynan)
