رەسەي ءوز تەرريتورياسىنا قول سۇعۋ ارەكەتتەرىنە قاتاڭ جاۋاپ بەرەدى. بۇل تۋرالى پرەزيدەنت ۆلاديمير پۋتين «جەڭىس» ۇيىمداستىرۋ كوميتەتىنىڭ وتىرىسىندا سويلەگەن سوزىندە ايتتى.
مەملەكەت كۇشەيە باستاعاندا، ونىڭ اياعىنان شالىپ، كەدەرگى جاساعىسى كەلەتىندەر سانى كۇرت ارتادى دەيدى رەسەي باسشىسى. ونى ويىنشا رەسەيگە قارسى اگرەسسيا كسرو قۇلاعاننان كەيىن دە توقتاعان ەمەس.
"بارلىعى دا ءبىزدى تىستەپ العىسى نەمەسە ءبىزدىڭ ءبىر بولشەگىمىزدى جۇلىپ العىسى كەلەدى. بىراق ءبىزدى تىستەگىسى كەلگەندەر مىنانى ءبىلسىن، ءبىز ولار ەندى تىستەي الماستاي ەتىپ ءتىسىن قاعىپ الامىز", - دەدى پۋتين.
ول مىسال رەتىندە بىرقاتار ساياساتكەرلەردىڭ رەسەيگە "تيەسىلى ەمەس" دەپ ءسىبىر بايلىعىنا كوز الارتقانىن ايتا كەتتى. پۋتين رەسەي تەرريتورياسىنا باسىپ كىرۋ ارەكەتتەرىن جاۋاپسىز قالدىرمايتىندىعىنا سەندىردى، بۇل رەتتە پرەزيدەنت الەمدەگى ەڭ ۇلكەن اۋماعى بار رەسەيدىڭ جوعارى الەۋەتىن اتاپ ءوتتى. سونىمەن بىرگە، ول رەسەيدىڭ قورعانىس سەكتورىنا قارجى ينۆەستيتسيالارى بويىنشا العاشقى وندىقتىڭ سوڭعى قاتارىندا تۇرعانىن، ەلدە ەكونوميكانى ميليتاريزاتسيالاۋ جۇرگىزىلمەگەنىن ەسكە سالدى.
"ادىرنا" ۇلتتىق پورتالى
